Në kuadër të partneriteteve dhe projekteve të Fakultetit të Shkencave Humane, Edukimit e Arteve Liberale, BIRN Albania prezantoi për studentët e fushave të ndryshme në UET gjetjet e një studimi një vjeçar mbi narrativën dezinformuese kundër BE dhe NATO në mediat shqiptare.

Dezinformimi kundër NATO-s dhe BE-së është i pranishëm në mediat shqiptare. 1263 artikuj, ose 8,3% e gjithë artikujve të marrë në analizë kishin përmbajtje dezinformuese. Vetëm 283 artikuj mbështesnin qartë këto institucione ndërkombëtare, ndërsa 13.574 artikuj ishin neutralë. Ishin këto gjetjet në terma sasiorë  të studimit të mbështetur nga BIRN Albania dhe të prezantuar nga gazetarja Viola Keta për studentët e UET.

Në këtë takim morën pjesë studentë të programeve të ndryshme të studimit, jo vetëm të komunikimit dhe gazetarisë, por edhe të drejtësisë, shkencave politike e marrëdhënieve ndërkombëtare, psikologjisë etj., të cilët përmes pyetjeve u përpoqën të kuptojnë dhe marrin më tepër informacion për kontekstin global të zhvillimit dhe trajtimit të çështjes së dezinformimit, por edhe qëndrimit që mbajnë vetë institucionet e prekur ndaj këtij narracioni.

Prezantimi i këtij projekti vjen në kuadër të partneriteteve të Fakultetit, nën drejtimin e dekanes Prof. Asoc. Dr. Belina Budini për projektet e bashkëpunimit të nisura me Read/AADF, AKKSHI, AMA, Jean Monnet Chair dhe mediat, si: Euronews Albania, Digitalb, Gazeta Liberale, etj.

Me indicien e këtyre projekteve, Fakulteti i Shkencave Humane, Edukimit dhe Arteve Liberale ka futur këtë vit të ri akademik profilin e ri të studimeve “Data Journalism”, pjesë e programit Master Profesional “Komunikimi dhe Media Digjitale”. Nëpërmjet këtij profili, studentët dhe profesionistët e rinj të mediave dhe jo vetëm, do të kenë mundësi të zbërthejnë e analizojnë të dhënat, por edhe t’i paraqesin ato në formë tërheqëse dhe të kuptueshme për audiencën.

“Për narrativen dezinformuese ne kemi një studim të nisur me pedagogët e UET dhe me televizionet shqiptare. Është vetëm për BE-në. Tematika është shumë e afërt me çfarë ne hulumtojmë në universitet dhe jemi duke e përgatitur për publikim te revista shkencore “Polis”, revista e fakulteti të Shkencave Humane, Edukimit dhe Arteve Liberale”. E mirëprita këtë prezantim sepse është shumë i dobishëm për studentët”, tha dekania Prof. Asoc. Dr. Belina Budini.

Duke shpjeguar metodologjinë e kërkimit, Keta sqaroi për studentët se në studim u morën 36 media dhe platforma sociale, gjatë periudhës maj 2023- maj 2024 dhe u monitoruan 196.597 artikuj. Filtrimi dhe analiza e narrativës me fjalë kyçe u bë përmes përdorimit të AI  (Sentione).

Por përveç të dhënave sasiore, studimi nxori edhe të dhëna cilësore mbi arsyet e këtij dezinformomi në mediat shqiptare. Sipas gjetjeve të studimit, nuk u identifikua koordinim i qëllimtë për përhapjen e tij. Kjo narrativë anti-NATO dhe BE vinte më shumë për shkak të mungesës së filtrave editorialë dhe verifikues, shmangies së parimeve gazetareske në raport me sensacionalizmin për të fituar klikime, si dhe mungesë njohurish për rolin dhe funksionin e BE dhe NATO.

Studimi kishte identifikuar nga 10 narrativa kryesore për secilin subjekt të kërkimit. Referuar atyre kundër BE, viheshin re narrativa të tilla, si: BE po shkel lirinë e shtypit duke mbyllur mediat ruse; Anëtarësimi i Ukrainës në BE sjell katastrofë për Europën; BE e padrejtë ndaj Serbisë, e kërcënon me sanksione për ngjarjet në Kosovë; BE dhe SHBA po vjedhin asetet ruse për rindërtimin e Ukrainës; Vendet e BE janë t përçara, etj.

Sa i përket dezinformimit anti- NATO, viheshin re narrativa të tilla, si: Mercenarë nga Ballkani po luftojnë në Ukrainë; SHBA dhe Perëndimi kanë dështuar në luftën kundër Islamofobisë; Bombardimet e NATO-s në Serbi ishin në shkelje të ligjit ndërkombëtar; NATO po përdor qendra kibernetike për sulme kundër Rusisë; NATO nuk do t'i mbrojë aleatët që nuk investojnë mjaftueshëm, etj.

Sipas Viola Ketës, na intereson ta njohim dezinformimin kundër NATO dhe BE pasi përçahet opinioni publik, krijohen faktorë anti-perëndimore, ulet besimi te institucionet, faktorë të cilët reflektohen pastaj në vendimmarrje.