Barcelona ka nisur zyrtarisht përgatitjet në Japoni, ku nesër do të përballet në një ndeshje miqësore me skuadrën japoneze Vissel Kobe. Katalanasit zhvilluan këtë të shtunë seancën e parë stërvitore, ndërsa pas saj, sulmuesi polak Robert Lewandowski foli për mediat, duke ndarë pritshmëritë e tij për sezonin e ri.

“Ne duam të punojmë shumë; jemi këtu për të luajtur miqësore, por edhe për t’u përgatitur sa më mirë për sezonin e ardhshëm,” u shpreh Lewandowski.

Sulmuesi veteran theksoi se qëllimi i tij dhe i skuadrës është përmirësimi dhe fitimi i më shumë trofeve.

“Për mua dhe për ekipin, e rëndësishme është të dimë ku duam të shkojmë dhe sa tituj duam të fitojmë. Golat janë të rëndësishëm, por po ashtu edhe loja dhe kontributi në fushë. Kemi potencial për të bërë më mirë se sezonin e kaluar,” tha ai.

Lewandowski pranoi se skuadra kaloi momente jo të mira sezonin që lamë pas, por u shpreh optimist për të ardhmen: “Kishim një ekip të ri, me shumë të rinj. Me më shumë përvojë, mund të përmirësohemi.”

Ai vlerësoi edhe dy emra të njohur në botën e futbollit, Marcus Rashford dhe talentin e Barcelonës, Lamine Yamal, duke treguar entuziazëm për të ardhmen e ekipit.

Në fund, i pyetur nëse ky do të jetë sezoni i fundit me Barcelonën, Lewandowski u shpreh i qetë: “Nuk e di nëse do të jetë viti im i fundit. Ajo që ka rëndësi tani është sezoni që kemi përpara, jo ajo që ndodh në fund.”