Ministri i Mbrojtjes, Pirro Vengu, vizitoi sot Qarkun e Beratit për të ndjekur nga afër përpjekjet për shuarjen e zjarreve në zonën e Shpiragut, si dhe për të monitoruar operacionet ajrore që po zhvillohen nga baza ajrore e Kuçovës. Në këtë bazë janë dislokuar avionët zjarrfikës të ardhur nga vendet partnere të Shqipërisë përmes Mekanizmit të Mbrojtjes Civile të BE-së.

Ministri bëri të ditur se vendi po përballet me një nga ditët më të nxehta të verës, me temperatura që kanë shkuar deri në 45°C, duke ndikuar drejtpërdrejt në përhapjen e flakëve. Sipas tij, vetëm në 24 orët e fundit janë regjistruar 36 vatra zjarri në të gjithë vendin, prej të cilave 12 janë shuar, ndërsa 24 mbeten ende aktive.

“Operacionet ajrore janë ndërprerë përkohësisht për shkak të errësirës, por do të rifillojnë me të gdhirë,” tha Vengu, duke shtuar se ndërhyrjet nga toka po vijojnë pa ndërprerje me forca zjarrfikëse, ushtarake dhe vullnetarë të angazhuar në të gjitha bashkitë e prekura.

Ai përmendi tre qarqe si më problematiket aktualisht: Beratin, Vlorën dhe Dibrën. Në veçanti, zonat e Shpiragut dhe Paftalit në Berat, si dhe fshatrat bregdetare Borsh, Piqeras, Selenicë, Shashicë dhe Kaninë në Vlorë, përbëjnë shqetësim për shkak të afërsisë me banesat dhe infrastrukturën energjetike.

“Jemi në gatishmëri të plotë për të mos lejuar përkeqësim gjatë natës. Forcat janë në terren dhe po bëjnë maksimumin për të mbajtur situatën nën kontroll,” u shpreh ministri.

Ai falënderoi aleatët ndërkombëtarë për reagimin e shpejtë, duke theksuar ndihmën e ardhur nga Italia dhe Kroacia, të cilat kanë dërguar avionë Canadair për të ndihmuar në përballimin e situatës.

“Partnerët tanë europianë kanë treguar edhe një herë solidaritet dhe gatishmëri për të ndihmuar. Mekanizmi i Mbrojtjes Civile i BE-së është aktivizuar dhe jemi në kontakt të vazhdueshëm për çdo mbështetje të mëtejshme,” përfundoi Vengu.