Tirana College of Technology (TCT) sjell ofertën më të re akademike për studentët dhe tregun e punës në Shqipëri dhe më gjerë.

Pas 10 viteve të suksesshme me programet profesionale, me licensimin e Ministrisë së Arsimit dhe Sporteve, TCT ofron për vitin akademik 2025- 2026 edhe katër programe të reja në ciklin bachelor, në: Inxhinieri Mekanike; Inxhinieri Civile; Inxhinieri Elektronike dhe Inxhinieri Software.

Prej datës 29 korrik, të gjithë maturantët mund të zgjedhin në portalin online U-Albania katër programet e reja bachelor, të cilat kanë kryefjalë teknologjinë dhe zhvillimet më avangardë në fushat përkatëse.

Tirana College of Tecnology vijon misionin mbi themelet e forta të Kolegjit Profesional të Tiranës, krijuar në 2015-ën, për të përmbushur nevojat e industrisë për zbatues dhe teknikë të lartë. Ai erdhi si një institucion risi i arsimit të lartë shqiptar dhe ka diplomuar mbi 1000 studentë, në 10 programet dy vjeçar. Profesionistët e dalë nga ky kolegj sot kanë një vend të sigurt në tregun e punës, duke dhënë kontribut të vyer për ekonominë e vendit dhe shoqërinë.

Pas drejtimit për një dekadë nga Rektori dhe akademiku i njohur, Prof. Dr. Luan Karcanaj, Tirana College of Tecnology e nis rrugëtimin e dekadës së dytë me Rektorin Prof. Dr. Ing. Andonaq Londo Lamani, gjithashtu një emër i spikatur dhe me një përvojë gati 40-vjeçare në auditorë.

Rrugëtimi i institucioneve të arsimit të lartë që nisin si kolegje dhe më tej shndërrohen në universitete nuk është një praktikë e panjohur në arsimin e lartë ndërkombëtar. Mjafton të përmendim këtu institucionin privat të arsimit në SHBA, Massachusetts Institute of Technology- MIT, i cili mori jetë në vitet ’60 të shekullit të XIX, i përqendruar në fushat e teknologjisë dhe shkencës, duke u bërë ndër vite një nga institucionet më të rëndësishme të novacionit dhe kërkimit shkencor në botë.