Presidenti Joe Biden kishte një detyrë për të përmbushur në debatin përballë rivalit republikan, që të bindte kritikët, por ai dështoi plotësisht - shkruan The Economist në një analizë pas përballjes së djeshme mes kandidatëve në zgjedhjet për Shtëpinë e Bardhë
Misioni për Joe Biden në debatin presidencial të mbajtur në Atlanta më 27 qershor ishte i qartë: të vërtetonte se kritikët e tij e kishin gabim, duke treguar se ai ishte i aftë mendërisht dhe në këtë mënyrë të kthente deficitin e votimit që e bën Donald Trump favoritin për të fituar zgjedhjet amerikane në 2024.
Fatkeqësisht, performanca e tij ishte edhe më katastrofë nga çfarë pritej – ndoshta më e keqja e çdo kandidati presidencial në historinë moderne. Presidenti, i cili është 81 vjeç (dhe do të jetë 86 vjeç në fund të një mandati të dytë në detyrë), belbëzoi në mënyrë të padëshifrueshme, u përpoq për të rrëzuar kritikët dhe sulmet ndaj tij, mirëpo dëshmoi se dyshuesit e tij ishin plotësisht të saktë.
Megjithëse zoti Trump ishte në formën e tij tipike – ‘helmues’, mashtrues, hakmarrës – ai u shfaq në një farë mënyre më koherenti dhe më i kthjellti nga rivali në detyrë. Vendimi i zotit Biden për të kërkuar që të rizgjidhej në vend që të qëndronte mënjanë për një flamurtar më të ri tani duket si një rrezik i pamatur i demokracisë që ai pretendon se dëshiron të mbrojë.
Joe Biden tani duhet t'i lërë vendin një kandidati alternativ - nënvizon "The Economist".
Në nëntor 2022, The Economist shkroi se, pasi ka shërbyer për publikun gjatë gjithë jetës, Joe Biden nuk duhet të kërkojë rizgjedhjen si president. Në janar të këtij viti revista thotë se i vendosi shqetësimet e saj në kopertinë. Por edhe ata që shqetësoheshin për moshën e tij nuk ishin të përgatitur për debatin e së enjtes kundër Donald Trump. Mbi 90 minuta vuajtëse, zoti Biden ishte i hutuar dhe jokoherent - tepër i pafuqishëm, për të përballuar katër vjet të tjera në punën më të vështirë në botë.
Biden thotë se po qëndron sërish në detyrë për të ndihmuar amerikanët e zakonshëm dhe për të shpëtuar demokracinë nga demagogjia hakmarrëse e Trump. Dhe paraqitja e dobët, evazive dhe sfiduese e së vërtetës së ish-presidentit në skenën e debatit nuk bëri asgjë për të zvogëluar urgjencën e këtyre dy synimeve. Megjithatë, nëse zoti Biden interesohet vërtet për misionin e tij, atëherë shërbimi i tij i fundit dhe më i madh publik duhet të jetë tërheqja për një kandidat tjetër demokrat.
/Liberale.al/
