Aktualitet

Meta reagon për maturantët: Të merren në shqyrtim kërkesat e tyre

Shkruar nga Liberale
Meta reagon për maturantët: Të merren në shqyrtim

Presidenti i Republikës, Ilir Meta ka reaguar për protestën e maturantëve para ambienteve të Ministrisë së Arsimit.

Nëpërmjet një shënimi në Facebook, Meta shprehet se Komiteti i Maturës Shtetërore duhet të marrë në shqyrtim të gjitha kërkesat që kanë maturantët shqiptarë.

Sipas tij, provimi duhet të shërbejë si një vlerësim i drejtë i dijeve të nxënësve në kohë të vështira dhe jo si një ndëshkim ndaj pamundësisë objektive të tyre për arritjen e rezultateve të kërkuara.

Reagimi i plotë:

Po ndjek me shqetësim protestën e maturantëve dhe kërkesat e tyre ndaj autoriteteve përgjegjëse.

I bëj thirrje Komitetit të Maturës Shtetërore që në përmbushje të detyrimit ligjor dhe përballë kërkesave të studentëve, në transparencë të plotë, të marrë sa më parë në shqyrtim të gjitha shqetësimet e tyre dhe t’u përgjigjet me përgjegjësi të plotë.

Edhe zëri i vetëm i një maturanti duhet dëgjuar, vlerësuar dhe sqaruar për paqartësitë dhe vështirësitë që ka hasur në këtë kohë pandemie.

Viti që kaloi ka qenë shumë i vështirë për të gjithë sistemin arsimor, por në mënyrë të veçantë për maturantët tanë.

Provimi i Maturës Shtetërore të shërbejë si një vlerësim i drejtë i dijeve të tyre në kohë të vështira, dhe jo si një ndëshkim ndaj pamundësisë objektive të studentëve dhe kufizimeve të pamerituara për arritjen e rezultateve të kërkuara!

Liberale Newsroom

Poll
SHQIPENGLISH