Një moment i papritur gjatë koncertit të grupit legjendar britanik Coldplay në Boston ka shkaktuar një stuhi reagimesh në rrjetet sociale dhe jo vetëm. Ajo që duhej të ishte një natë e zakonshme argëtimi, përfundoi në një skandal publik, kur kamerat e transmetimit live fokusuan në ekranin gjigant një moment të afërt mes dy personave të njohur – Andy Byron, CEO i kompanisë amerikane të teknologjisë Astronomer, dhe Kristin Cabot, drejtore e burimeve njerëzore në të njëjtën kompani.

Pamjet tregojnë Byron dhe Cabot në një situatë tepër të përzemërt dhe intime, ndërsa ishin ulur bashkë në publik. Momenti u filmua nga kamerat e koncertit dhe u shfaq në ekranin gjigant të skenës për të gjithë të pranishmit, si dhe për ndjekësit online që po e ndiqnin ngjarjen në transmetim të drejtpërdrejtë.

Situata mori një tjetër kthesë kur vokalisti i Coldplay, Chris Martin, bëri një koment me humor nga skena:
“Shikoni këta të dy... Oh, ose kanë një aferë, ose janë thjesht shumë të turpshëm.”

Ajo që e ndezi edhe më shumë debatin ishte fakti se Byron është i martuar dhe baba i disa fëmijëve, të cilët, sipas mediave amerikane, ishin në shtëpi në momentin që ndodhi incidenti. Në rrjetet sociale, përdoruesit shpërndanë pamjet me kritika të ashpra për sjelljen e CEO-së dhe ngritën pyetje serioze mbi etikën në vendin e punës, veçanërisht kur bëhet fjalë për marrëdhënie të mundshme mes drejtuesve të lartë dhe vartësve të tyre.