Rumania po përballet me një situatë emergjente si pasojë e përmbytjeve masive që kanë goditur kryesisht zonat lindore të vendit. Deri më tani, autoritetet rumune kanë konfirmuar të paktën 3 viktima, ndërsa dëmet materiale janë të mëdha.
Shirat e rrëmbyeshëm, të shoqëruar me ndërprerje të energjisë dhe rrëshqitje dheu, kanë detyruar qindra qytetarë të braktisin banesat, ndërsa mijëra shtëpi janë përmbytur apo shkatërruar plotësisht.
Ekipet e emergjencës dhe shpëtimit janë në terren duke u përpjekur të evakuojnë banorët e bllokuar dhe të shpëtojnë ata që ndodhen në zona të izoluara.
Autoritetet vendase kanë paralajmëruar për rrezik të shtuar për përmbytje të tjera, sidomos në zonat malore dhe përgjatë lumenjve të fryrë nga shirat e dendur.
“Qytetarët duhet të tregojnë kujdes maksimal dhe të largohen menjëherë nga zonat me rrezik të lartë për jetën,“ thuhet në një deklaratë zyrtare të autoriteteve rumune.
