Zjarret e fuqishme që kanë përfshirë disa rajone të Turqisë gjatë muajit të fundit kanë shkaktuar të paktën 17 viktima, ndërsa vendi përballet me valë të të nxehtit dhe erëra të forta që po përhapin flakët me shpejtësi të madhe në rajonin e Mesdheut lindor.

Vetëm jashtë qytetit Bursa, i katërti më i madh në vend, numri i të vdekurve është rritur në katër, pasi dy zjarrfikës vullnetarë ndërruan jetë në spital. Ata u plagosën rëndë kur një cisternë uji u përmbys gjatë rrugës për në një vatër zjarri në pyll. Më herët, një punëtor kishte humbur jetën në vendngjarje, ndërsa një zjarrfikës tjetër vdiq pas një ataku kardiak.

Për shkak të përhapjes së flakëve, mbi 3,500 persona u detyruan të largohen nga shtëpitë e tyre gjatë fundjavës, ndërsa autoritetet vazhdojnë evakuimet dhe përpjekjet për të vënë situatën nën kontroll.

Tragjedia më e madhe ndodhi javën e kaluar në Eskisehir, ku 10 vullnetarë dhe punonjës pyjorë humbën jetën në një zjarr masiv. Shumë prej tyre ishin përfshirë në përpjekjet për shuarjen e flakëve kur situata doli jashtë kontrollit.

Sipas Ministrit të Pylltarisë të Turqisë, Ibrahim Yumakli, vetëm të dielën janë regjistruar 44 zjarre të ndryshme në të gjithë vendin. Edhe pse disa prej tyre janë vënë nën kontroll, sipërfaqe të mëdha pyjore janë djegur dhe dëmet janë të mëdha.

Autoritetet turke kanë shtuar forcat dhe mjetet në terren, ndërkohë që apelojnë për kujdes dhe bashkëpunim nga qytetarët për të shmangur çdo veprim që mund të shkaktojë zjarr.