Ministri i Punëve të Jashtme të Serbisë, Nikola Selakoviç ka deklaruar sot se i ka dorëzuar presidentit Aleksandar Vuçiq, notat diplomatike të katër vendeve që tërhoqën njohjen e Kosovës.
“Këshilli i Sigurisë Kombëtare autorizoi presidentin Vuçiq që të informojë publikun e gjerë për vendet në fjalë kur ai ta shohë të nevojshme”, tha Selakoviç.
Sipas tij, me këtë gjest, Beogrdi dëshiron t’u japë një shans shteteve anëtare të Këshillit të Europës që në qershor të mos nisin procedurën e pranimit të Kosovës në këtë organizatë, shkruan Euronews Serbia.
Selakoviç u shpreh se shërbimet e inteligjencës së Serbisë kanë mësuar se së paku dy shtete të mëdha po punojnë për t’i ofruar mbështetje serioze logjistike Prishtinës në fushatën për njohje të reja, si dhe për të ndalur fushatën e Serbisë për tërheqjen e njohjeve.
Kosova aplikoi më 12 maj për t’u bërë pjesë e Këshillit të Evropës. Ka qenë vetë Ministrja e Jashtme e Kosovës, Donika Gaërvalla, e cila ka dorëzuar në Strasburg kërkesën zyrtare.
