Policia greke ka ngritur akuza ndaj pesë personave në lidhje me vrasjen e profesorit të njohur amerikan, Przemyslaw Jeziorski, i cili u qëllua për vdekje më 4 korrik në një lagje të Athinës.

43-vjeçari, profesor i ekonomisë dhe marketingut në Universitetin e Kalifornisë – Berkeley, ndodhej në Greqi për të vizituar fëmijët dhe për të marrë pjesë në një seancë gjyqësore për kujdestarinë e tyre.

Ngjarja tragjike ndodhi në mes të ditës, rreth orës 16:15, pranë shtëpisë së ish-bashkëshortes së tij në lagjen Agia Paraskevi. Sipas policisë, Jeziorski u qëllua me disa plumba në qafë dhe kraharor nga një person i maskuar. Në vendin e ngjarjes u gjetën shtatë gëzhoja të kalibrit 9 mm.

I dashuri aktual i ish-bashkëshortes ka pranuar autorësinë e vrasjes dhe është akuzuar për vrasje me paramendim. Tre persona të tjerë – dy shtetas shqiptarë dhe një bullgar, njëri prej të cilëve i mitur – janë akuzuar si bashkëpunëtorë në krim.

Edhe ish-bashkëshortja e viktimës është akuzuar si bashkautore, por ajo, përmes avokatit të saj, mohon çdo përfshirje në vrasje.

Të pesë të arrestuarit janë paraqitur para prokurorit mëngjesin e së enjtes dhe kanë afat deri të hënën për të përgatitur mbrojtjen e tyre.