Në një hap të ri diplomatik për nxitjen e paqes dhe bashkëpunimit rajonal, Turqia ka marrë iniciativën për krijimin e Platformës së Paqes në Ballkan, e cila u inaugurua në një seancë të veçantë të mbajtur në Stamboll.

Ministri i Jashtëm turk, Hakan Fidan, ishte mikpritësi i kësaj nisme që synon të thellojë dialogun, të forcojë besimin e ndërsjellë dhe të nxisë bashkëpunimin rajonal përballë sfidave të përbashkëta me të cilat përballet Ballkani.

Në margjinat e kësaj seance inauguruese, Fidan zhvilloi takime dypalëshe me homologët e tij nga disa vende të Ballkanit Perëndimor. Ai u takua me:

Timço Mucunski, ministër i Jashtëm i Maqedonisë së Veriut
Elmedin Konakoviq, ministër i Jashtëm i Bosnjë e Hercegovinës
Marko Gjuriq, ministër i Jashtëm i Serbisë
Ervin Ibrahimoviq, ministër i Jashtëm i Malit të Zi
Në fokus të bisedimeve ishin forcimi i marrëdhënieve bilaterale, stabiliteti rajonal dhe mundësitë për bashkëpunim në kuadër të nismës së re turke.

Platforma e Paqes në Ballkan synon të ofrojë një forum të rregullt dialogu mes vendeve të rajonit për çështje të sigurisë, zhvillimit ekonomik, ndërlidhjes dhe shkëmbimeve kulturore, duke u ndërtuar mbi përvojat e mëparshme të diplomacisë ballkanike dhe rolit të shtuar të Turqisë në rajon.