Serbia dhe Kina kanë nisur stërvitjen e tyre të parë ushtarake të përbashkët, një hap i rëndësishëm në forcimin e bashkëpunimit ushtarak mes dy vendeve. Stërvitja me emrin “Rojtari i Paqes 2025” po zhvillohet në provincën Hebei, në veri të Kinës.
Ky veprim bën Serbinë vendin e vetëm kandidat për anëtarësim në Bashkimin Evropian që zhvillon stërvitje të tilla me Kinën, gjë që ka ngjallur shqetësime në Bruksel. Përfaqësues të BE-së kanë kërkuar nga Serbia që të përmbahet nga veprimet që nuk përputhen me politikën e jashtme të Bashkimit Evropian.
Në vitet e fundit, Serbia ka blerë armë dhe pajisje ushtarake kineze, përfshirë sistemin raketor FK-3 dhe dronë pa pilot. Për shkak të lidhjeve të saj me Kinën dhe Rusinë, Serbia vazhdimisht ka marrë paralajmërime nga BE dhe Shtetet e Bashkuara.
Analistët vënë në dukje se stërvitja me Kinën tregon një orientim më të afërt të Serbisë drejt Pekinit, duke sfiduar pretendimet për neutralitet ushtarak dhe synimet e anëtarësimit në BE. Në të njëjtën kohë, Serbia vazhdon të mbajë marrëdhënie të balancuara midis Perëndimit, Rusisë dhe Kinës.
