Midis të arrestuarve në kuadër të operacionit të gjerë të Prokurorisë së Posaçme, është edhe një zyrtare e Policisë së Shtetit.
Në pranga ka përfunduar Jonida Babameto (në foto), oficere e drejtorisë së kufirit dhe migracionit.
Po ashtu edhe Dedan Gjoni është vënë sot në pranga nga kolegët e tij, pas një aksioni policor me urdhër të SPAK për goditjen e një grupi të rrezikshëm kriminal, pjesë e të cilit dyshohet se është edhe Ervin Mata. Ai u prangos para ndeshjes së Kombëtares në Air Albania.
Ndaj Dedan Gjonit janë ngritur disa akuza për vepra të rënda penale, si ajo e sigurimit të kushteve për të kryer vrasje.
Si oficerja kufitare ashtu edhe shefi i krimve u prangosën sot së bashku me 11 persona të tjerë, përfshi edhe ish-drejtorin e Policisë Tiranë, Erzen Breçani. Nga SPAK është lëshuar urdhër arrest për djalin e Breçanit dhe Ervin Matën. Të gjithë dyshohet se janë pjesë e një grupi të strukturuar kriminal, të zbuluar pas zbërthimit të mesazheve të Ervis Martinajt në aplikacionin "SKY". Mësohet se djali i Erzen Breçanit është martuar me motrën e Ervin Matës.
