Aktualitet

Aksidentohet avioni i vogël privat në Aeroportin e Rinasit

Shkruar nga Liberale
Aksidentohet avioni i vogël privat në Aeroportin e Rinasit

Një incident ka ndodhur në Aeroportin e Rinasit sot rreth orës 15:00, ku është aksidentuar një avion i vogël privat.

Avionit privat, i cili vinte nga Zvicra, nuk iu hap rrota e parë. Piloti ishte me familjen e tij, mes tyre dhe 2 fëmijë, por nuk ka të lënduar.

Për incidentin ka reaguar edhe Aeroporti Ndërkombëtar i Tiranës.

"Aeroporti Ndërkombëtar i Tiranës njofton se në orën 16:15 të datës 28 Shtator 2021, një avion i vogël model Beechcraft me regjistrim zviceran HB-EFH, me 4 persona në bord, dy të rritur dhe dy fëmijë, të gjithë shtetas zviceranë, bëri ulje të detyruar në mes të pistës pasi pësoi një avari në sistemin e rrotave. Pasagjerëve u dha ndihma e parë menjëherë. Fatmirësisht nuk ka asnjë të lënduar dhe të katërt gëzojnë shëndet të plotë.

Pas lajmërimit të Organit Kombëtar të Investigimit të Incidenteve Ajrore dhe kryerjes së investigimit në zonën e pistës, avioni u zhvendos nga pista, si pasojë, operimet në Aeroportin Ndërkombëtar të Tiranës, u pezulluan për 1 orë e 45 minuta. Fluturimet rifilluan.TIA mbetet në dispozicion të çdo pasagjeri dhe falenderon të gjithë udhëtarët për bashkëpunimin dhe mirëkuptimin", njofton TIA.

 

Liberale Newsroom

Poll
SHQIPENGLISH