Kryesore

Lajmi më parë kalon nga Rama

               Publikuar në : 09:51 - 20/09/21 liberale

Ndër vendimet e para të Qeverisë Rama 3 janë krijimi i Agjencisë për Media dhe Informim, që pritet të centralizojë informacionin e Këshillit të Ministrave për publikut dhe ajo e Agjencisë për Bashkëqeverisjen, që kalon nga platforma online në një ekstra-strukturë hetimore që do të vendosë penalitete për funksionarët publikë. Duket se për kreun e qeverisë nuk janë të mjaftueshme zyrat e shtypit në ministri dhe Kryeministri dhe as puna e SPAK, e ngritur pikërisht për të hetuar dhe ndëshkuar zyrtarë të korruptuar

Suadela Balliu

Kryeministrit shqiptar nuk i mjafton më një Agjenci Telegrafike, e cila funksionon me paratë publike. Por as rrjetet e tij sociale, as televizioni personal online me siglat si të nistoreve të tij – që ka madje edhe të punësuar. Kreu i qeverisë njoftoi si një ndër katër vendimet e para të kabinetit të tij krijimin, organizimin dhe funksionimin e Agjencisë për Media dhe Informim.

Kjo agjenci, e cila pritet të njihet për publikun si “Media and Information Agency – MIA” e që do të regjistrohet si person juridik, në varësi të Kryeministrit, duket se do të jetë i vetmi burim informimi në lidhje me veprimtarinë e Këshillit të Ministrave.

Sipas VKM-së, kjo agjenci mëton të sigurojë transparencën në lidhje me politikat, aktivitetet, projektet, eventet, si dhe qëllimin, objektivat, risitë apo problematikat që zgjidhen nëpërmjet akteve të Këshillit të Ministrave dhe të akteve të tjera të ministrave dhe çdo institucioni të administratës shtetërore.
Agjencia, bëhet e ditur se do të financohet nga buxheti i shtetit, donacione dhe burime të tjera të ligjshme.

Ky hap, i qeverisë Rama 3, vjen pas ngrirjes së paketës shumë të debatuar “Anti-Shpifje” , që do të vinte në kontroll mediat online përmes AMA-s dhe një komiteti ankesash. Fillimisht ishte presidenti Meta ai që e çoi në Komisionin e Venecias pasi projektligji mori votat në Kuvend, ndërsa Opinioni i Ekspertëve dilte në konkluzion se e ashtuquajtura paketë nuk ishte gati për t’u adoptuar për shkak të vakumit ligjor. Rekomandimet e Venecias përfshinin rishikimin e ligjit, të cilin Këshilli i Europës e cilësoi si jo në përputhje me standardet europiane. Por, deri në përfundim të mandatit të dytë, qeveria nuk e risolli në Kuvend me ndryshime.

Ndërsa kjo paketë që parashikonte gjoba marramendëse dhe deri penalizime në mbyllje të mediave online, kryeministri Rama synon që të vërë në vijë mediat shqiptare – të cilat i ka cilësuar shpeshherë “kazan” – përmes kësaj agjencie të re, që do të drejtohet nga një Drejtor i Përgjithshëm por që do të përgjigjet para kreut të qeverisë.

Në një marrëdhënie shpesh polemizuese me gazetarët, të cilëve u kritikon, u ironizon pyetjet e komentet madje edhe ua sugjeron sesi duhet t’i formulojnë ato si në një studio televizive ashtu edhe në një konferencë për shtyp, Rama do të krijojë këtë agjenci që do të jetë ura lidhëse dhe burim komunikimi mes publikut dhe qeverisë.

Gjithçka tjetër e dalë jo nga kjo Agjenci, me gjasë do të konsiderohet si e pafaktuar apo në rastin më të keq, shpifje.

Ky Drejtor i Përgjithshëm, i cili po ashtu do të miratohet nga Kryeministri, do të ketë statusin e ministrit të shtetit, që deri më tani kjo qeveri i ka katër të tillë. Po ashtu ai do të jetë zëdhënës i Këshillit të Ministrave.

Si zëdhënës i Këshillit të Ministrave mund të jetë edhe zëvendësdrejtori i përgjithshëm ose çdo person tjetër i caktuar nga Kryeministri. Zëdhënësit e ministrave janë nëpunësit e agjencisë të përcaktuar nga drejtori i Përgjithshëm të cilët punojnë pranë institucioneve përkatëse.

Tanimë nuk do të mjaftojnë më zëdhënësit në çdo dikaster, por kjo agjenci do të ketë strukturat e saj në çdo ministri dhe do të përcaktohen nëpunës përgjegjës për informimin, komunikimin mediatik, të ngarkuar nga Agjencia me përfaqësimin e institucioneve respektive në komunikimet dhe raportet me publikun dhe mediat apo me çdo detyrë tjetër të ngarkuar nga drejtori i Përgjithshëm.

Megjithëse prej tridhjetë vitesh Shqipëria organizohet nën sistemin pluralist dhe demokraci- sado e brishtë- kjo agjenci jehon famëkeqen Ministri nën drejtimin e Goebbels të Propagandës dhe Ndriçimit Publik.

Sipas VKM-së, Agjencia do të drejtojë dhe koordinojë punën e strukturave/nëpunësve përgjegjës për informimin dhe komunikimin mediatik dhe çështjet publike si dhe do të koordinojë organizimin e aktiviteteve informuese, konferencave për shtyp dhe çdo eventi publik të këtyre institucioneve.
Edhe konferencat për shtyp të kryeministrit apo të ministrave do të organizohen nga kjo agjenci e po ashtu do të përfaqësojë Këshillin e Ministrave në këto konferenca nëpërmjet zëdhënësit të Këshillit të Ministrave apo personit të caktuar nga Kryeministri me këtë detyrë.

Në bashkëpunim me strukturat përgjegjëse, organizon aktivitete të tjera informuese për publikun dhe mediat mbi politikat, projektet, nismat, debatet mbi çështje publike, aktet e Këshillit të Ministrave apo të institucioneve të administratës shtetërore dhe sondazhe.

Do të përdorë të gjitha mjetet e komunikimit masiv/publik, digjital, ose jo, print ose on-line me qëllim realizimin e funksioneve të saj, por edhe do të vëzhgojë publikimet e mediave dhe mjetet e komunikimit masiv, për të evidentuar perceptimin dhe qëndrimin e publikut ndaj veprimtarisë së institucioneve të administratës shtetërore.

Agjencia që do të njihet si “MIA” pritet të organizojë takimet periodike me mediat të zëdhënësit të Këshillit të Ministrave, zëdhënësve të ministrave sipas fushave të tyre, të personave përgjegjës në institucionet e tjera të administratës shtetërore, si dhe organizon dhe mban konferencat për shtyp gjatë të cilave u jepet përgjigje pyetjeve të gazetarëve mbi zhvillimet e fundit politike. Përgjegjësi për shtypin në zyrën e zëdhënësit të Këshillit të Ministrave është pika e parë e komunikimit me gazetarët, sipas parashikimeve të rregullores së Agjencisë.

Krijimi i një strukture të tillë do ta bëjë edhe më të vështirë komunikimin publik e mediatik me ministra të caktuar apo zyrtarë të kabinetit qeveritar, pasi filtri do të jetë Agjencia në fjalë që do të miratojë ose jo daljet mediatike të zyrtarëve.

Por kryeministri Rama nuk është mjaftuar vetëm me krijimin e kësaj Agjencie për Mediat dhe Informimin. Edhe platformae Bashkëqeverisjes, e publicizuar shumë nga vetë kreu i qeverisë, si ajo e ku qytetarët depozitojnë dhe adresojnë ankesat dhe problemet e tyre online – disa syresh madje kanë marrë përgjigje nga vetë Rama – do të kthehet në nj agjenci.

Kjo agjenci e re, në bazë të ankesave apo sinjalizimeve të qytetarëve, do të nisë hetime dhe penalizime ndaj funksionarëve publikë.

Agjencia, në bashkëpunim me institucionin e administratës shtetërore, heton kryesisht të gjitha faktet dhe vlerëson të gjitha rrethanat e nevojshme për kontrollin e veprimtarisë administrative të institucionit të administratës shtetërore. Kur është e nevojshme kryerja e hetimeve të thelluara për konstatimin e fakteve të nevojshme të çështjes, titullari i institucionit, me paraqitjen e kërkesës së Drejtorit të Përgjithshëm të Agjencisë, miraton krijimin e një grupi pune, pjesë e të cilit do të jenë personat e ngarkuar nga drejtori i Përgjithshëm i Agjencisë sipas përcaktimit në kërkesë.

Ndërsa kryeministri i mblodhi pak kohë më parë kryebashkiakët e vendit – thuajse të gjithë nën siglën e Partisë Socialiste – duke i paralajmëruar se partia nuk do të mbrojë askënd dhe zjarri i SPAK do t’i djegë shumë, duke se nuk është mjaftuar me rolin e prokurorisë dhe drejtësisë së re.

Ishte Struktura e Posaçme Antikorrupsion që hetoi dhe vuri nën pranga kryebashkiakun e Lushnjës për korrupsion në tender e po ashtu disa zyrtarë të Ministrisë së Brendshme, për një tjetër tender, ndërsa BE pret që numri i zyrtarëve të dënuar për korrupsion dhe krim të rritet si një prej kushteve për çelje të negociatave, kryeministri krijon ekstra-struktura që do të paguhen me paratë publike. Një nismë të ngjashme, që luftonte grupet e ashtuquajtura KÇK, kryeministri e solli përmes paketës “Anti-KÇK” dhe Operacionit Forca e Ligjit që do të vepronte menjëherë në konfiskimin e pasurive të krimit.

Edhe kjo agjenci do të jetë nën varësinë e kryeministrit, ndërsa ai vetë e ka moderuar edhe publikisht me përgjigjet ndaj qytetarëve dhe po ai do të zgjedhë drejtuesin e saj.

Të dy këto paketa u miratuan në të parën mbledhje të qeverisë Rama 3, pas betimit tek presidenti Meta. Kjo agjenci gëzon të drejtën e masave disiplinore për funksionarët e institucioneve që shkelin vendimet e saj, deri në largim nga puna. “Nuk është opsionale. Projektligji çon në një nivel tjetër këtë marrëdhënie, duke i hapur rrugë ndërmjetësimit publik si një alternativë për të zgjidhur mosmarrëveshje administrative”, shprehet kreu i qeverisë, ndërsa duket si i vetmi lider i ndriçuar, i aftë të rregullojë marrëdhëniet e publikut me funksionarët e qeverisë qendrore dhe atyre vendore e po ashtu i vetmi në gjendje të informojë siç duhet shtetasit shqiptarë mbi punët e qeverisë, përtej mediave të etiketuara prej tij si “kazan”.

Projektligji për Agjencinë e Bashkëqeverisjes parashikon edhe një sistem vlerësimi ku qytetarët do mund të japin notën e tyre për shërbimet dhe drejtuesit e institucioneve. Kjo strukturë i ngjan një “Vëllai të Madh” që vëzhgon dhe që merr masa të ashpra disiplinore, që nisen nga ankesa online, shumë prej të cilave mund të jenë edhe anonime e të pabaza, ndërsa grupet e posaçme hetimore do të jenë ca lloje të rinj prokurorësh, që do të bëjnë punën e atyre që filtrohen çdo ditë për të qenë të denjë për institucionet e Drejtësisë së Re. Për Paketën Anti-KÇK, kryeministri zotohej se do të qe e përkohshme, derisa Reforma në Drejtësi të qe e plotë. Nuk dihet nëse edhe këto agjenci, që marrin jetë përmes VKM-ve do të kenë fat të përkohshëm apo do të kthehen në institucione të përhershme, që dublojnë si agjenci lajmesh, ashtu edhe organe të tjera të drejtësisë.

Gjekmarkaj: Rama po ndërton kolonat ku mbahet tempulli i gënjeshtrave

Deputeti dhe kryetari i Komisionit të Edukimit dhe Medias në Kuvendin e Shqipërisë, Agron Gjekmarkaj, ka reaguar lidhur me vendimin më të ri të qeverisë, për të krijuar një agjenci të re të medias.

Postimi i Gjekmarkajt:

“Agjencia për mediat” fytyra e mandatit të tretë ! Një qeveri e cila “fitoren” e vet e mbështeti tek “inxhinieria elektorale” nuk pritet që të ketë vizione për ta shtuar demokracinë në vend ! E kundërta është e vërtetë dhe logjike, minimi i saj me të gjitha mënyrat ! Shenja e parë pas mashtrimit elektoral ishte vete qeveria ku si sukses paraqiti vetëm numrin e madh të zonjave në të por që në vetvete është një ekzekutiv sa qesharak aq i dëmshëm! E para nga ligjërimi publik i prezantimit. Një gjuhë papagalli, me parulla të shpërlarë dominoi hapësirën akustike të parlamentit. Disa idiotësi varg e vistër si dhëmbë ari në gojën e qeverisë shkëlqyen gjithaq ! Asgjë konkrete për të ndihmuar qytetaret pos zërit të qashtër ku spikat r-ja e butë dhe e lëmuar !

E dëmshme se asnjë prej tyre nuk ka personalitet as profesional as politik e as publik për të përmbushur profilin e ministrit! Shumë mirë përmbushin një tjetër rol atë të hyzmeqarëve lepe peqe të Kryeministrit -Vezir i madh !! Akti i dytë pas pispillosjes fotografike që vendimi i këshillit të ministrave për “Agjencinë për mediat” një imitim gebelsian në brendi për të shtuar një tjetër instrument propagande, kontrolli e shantazhi ! Në fund të fundit po bën atë qe di më mirë -po ndërton kolonat ku mbahet tempulli i gënjeshtrave të tij ! Është në të drejtën e tij si korruptues dhe kontrollues i lirisë se fjalës dhe demokracisë në këtë vend ta bëjë këtë siç është në të drejtën e saj opozita e Shqipërisë për të mbrojtur lirinë e fjalës , punëtorët e saj, mediat nga shantazhi e presioni e vendosur më shumë se kurrë për çdo beteje në mbrojtje të fjalës së lirë!

Sot Opozita ka shume armiq dhe agresore, shoqëria gjithashtu , liritë dhe shpresat po kaq, një i ri u shtua me “agjencinë” ! Shumë armiq shumë nder ! Beteja për sundimin e ligjit kundër sundimtarëve nuk do të ndalet, nuk do të blihet, nuk do të mposhtet ! Ajo do të triumfojë ! Historia e progresit njerëzor na e jep këtë leksion !

Godole : Qeveria “Rama 3”, propagandë dhe censurë me vulë kryeministrore

Sekretarja për të Përndjekurit Politikë në PD dhe pedagogia e gazetarisë, Jonila Godole, e ka cilësuar si një ogur të keq për lirinë e shprehjes dhe gazetarinë, krijimin e një agjencie të re për mediat dhe informimin.

Nëpërmjet një statusi në rrjete sociale, ajo i bën thirrje shoqatave të gazetarëve, këshillit të medias që të reagojnë ndaj kësaj VKM.

Postimi i Jonila Godoles:

Fakti që një nder vendimet e para te marra sot nga qeveria “Rama 3” qe krijimi i një Agjencie për Mediat dhe Informimin, është ogur i keq për lirinë e shprehjes dhe gazetarinë.
Sepse ky duket qe do te jete mandati i propagandës dhe censurës se ligjëruar me vule kryeministrore!
Sot kryeministri kurorëzoi ligjin “antishpifje“, për te cilin mori goditje dy vjet me pare nga te gjitha institucionet ndërkombëtare.
Shpresoj qe shoqatat e gazetareve, Këshilli i Medias dhe Etikes dhe gjithë organizmat e tjera te shprehen kundër kësaj VKM qe cenon dukshëm lirinë e shprehjes ne Shqipëri.
Nëse kemi një agjenci informimi mediatik pranë Kryeministrit, cili rol i mbetet atëherë ATSH? Po i transmetuesit publik RTSH? Taksapaguesit shqiptar nuk mund t’i kërkohet te paguaje tre institucione qe t’i shërbejnë qeverise?! Dhe as nuk mund te detyrohet te paguaje kostot e ERTV; se ngado qe ta kthesh këtë Agjenci, ky duket te jete misioni i saj i vërtetë! /Gazeta Liberale


KOMENTO (0)

Shkruaj nje koment

Your email address will not be published. Required fields are marked *

* *

Back