Kampionët e Shqipërisë, Egnatia, do të zbresin nesër në fushën e lojës për ndeshjen e kthimit të raundit të parë kualifikues në UEFA Champions League ndaj ekipit islandez, Breidablik. Sfida do të zhvillohet në orën 21:00, në Islandë.
Pas fitores 1-0 në ndeshjen e parë, të luajtur në stadiumin “Egnatia Arena”, skuadra nga Rrogozhina udhëton drejt Islandës me një avantazh të rëndësishëm, por gjithçka mbetet e hapur për një përballje që pritet të jetë e luftuar deri në fund.
Goli i vetëm i takimit të parë, i shënuar nga Arbër Hoxha, ka rritur moralin dhe besimin e ekipit që drejtohet nga Edlir Tetova, i cili ka theksuar se ekipi do të hyjë në fushë me synimin për të bërë historinë dhe për të kaluar në raundin e dytë, aty ku i pret një sfidë edhe më e madhe në arenën europiane.
Në prag të ndeshjes, Federata Shqiptare e Futbollit ka uruar skuadrën e Egnatias për sukses dhe një paraqitje dinjitoze, duke shpresuar që kjo përfaqësuese shqiptare të ecë sa më gjatë në këtë kompeticion të rëndësishëm.
