Pas disa orësh diskutimesh që zgjatën deri në orën 17:30 të së hënës, Bashkia e Librazhdit ka zbatuar urdhrin e Kryeministrit Edi Rama për ristrukturimin e administratës vendore, duke sjellë dorëheqje në bllok të një pjese të drejtuesve lokalë.
Në përfundim të mbledhjes së zhvilluar me strukturat vendore, kanë dhënë dorëheqjen nënkryetarët e bashkisë, administratorët e njësive administrative, si dhe të gjithë drejtorët që kishin më shumë se dy vite në detyrë.
Ky hap vjen si pjesë e një nisme të gjerë të ndërmarrë nga Kryeministri Rama, e cila synon të sjellë frymë të re në drejtimin lokal, duke rritur efikasitetin dhe përgjegjshmërinë në administratën publike në të gjitha bashkitë e vendit.
Ndërkohë, më herët gjatë ditës së sotme, dorëheqje masive janë raportuar edhe në bashkinë e Elbasanit, ndërsa ende nuk ka njoftime zyrtare për zhvillime të ngjashme nga bashkitë Prrenjas, Gramsh, Cërrik, Belsh dhe Peqin.