Kryesore

Vera e pasigurisë së madhe

               Publikuar në : 11:25 - 01/08/20 liberale

Me COVID-19 mes nesh, ekonominë e gjunjëzuar dhe provokimin e fundit politik të Kushtetutës së njëanshme, kjo është një verë në krizë të shumëfishtë. E ardhmja mund të shkojë në të gjitha drejtimet përsa kohë vaksina mbetet e pazbuluar   

Kur mendoj për botën pas Covid-19, më kujtohet një frazë nga “Novelat e pakuptimta” të Stefën Lilok: ”Lord Ronaldi nuk tha asgjë; ai doli nga dhoma, i hipi kalit të tij, dhe nisi të kalërojë si i çmendur në të gjitha drejtimet!”.- thoshte Ivan Krastev, një nga mendimtarët kryesorë evropianë mbi demokracinë, në një intervistë të ditëve të fundit.

Sot, gjshtë muaj pas marsit të këtij viti, kur pandemia e coranavirusit pushoi njëherësh jetën në pjesën më të madhe të botës pyetjet e mëdha rreth të ardhmes së afërt janë ende pa përgjigje? A do të ketë një valë të dytë të COVID-19? A ka arritur kulmin pandemia? Do të mbyllemi sërish në vjeshtë apo dimër? A do kthehemi  të jetojmë ndonjëherë në rutinën siç e kemi njohur deri tani? Kur do të dalë vaksina anti COVID-19 dhe a është ajo shpëtimi?

Sido që të shkojë, vera e këtij viti do të mbahet mend si një nga të pasigurtat dhe më të paqartat. Sapo rastet e infektimeve filluan të ulen, rekordet negative në SHBA, ringritja e kurbës së infektimeve në Spanjë dhe Gjermani treguan se rikthimi në jetën normale kalon nëpërmjet humbjes së jetëve njerëzore. Sigurisht që rimbyllja është opsioni më i largët dhe bashkëjetesa me virusin duket se është e do të jetë zgjedhja e shkencëtarëve dhe udhëheqësve të shteteve. Por një gjë është e sigurtë; tani për tani, jo si më parë.

Kriza shëndetësore dhe ekonomike

Që pas Luftës së Dytë Botërore, asnjëherë sistemet shëndetësore nuk kanë treguar limitet e tyre si këto kohë të vështira. Apokalipsi italian qe i pari, por jo më i rëndi. Në Spanjë, Britani të Madhe,  SHBA e Brazil skenat me të sëmurë që iknin nga kjo botë të braktisur jo vetëm nga të afërmit por edhe në shumë raste nga nga personeli mjekësor tronditën botën mbarë. Infrastruktura spitalore, shtretërit dhe respiratorët u kthyen në materialet më të çmuara nga varej e ardhmja e popullsisë.

Mbyllja shqiptare e nxitur nga alarmi i qeverisë ishte nga më drastiket së pari për shkak të kapaciteteve minimale dhe numrit të pakët të mjekëve në këtë fushë. Dikush ka përmendur shifrën 120, që do të thotë se me një përhapje të madhe të  sëmundjes në pikun e virusit pamjet shokuese nga çendi fqinj do të përjetoheshin edhe tek ne. Frika e qytetarëve funksionoi, virusi normal që ishte po aty, madje i panjohur sa edhe në fillim. Hapja e majit ishte shpresëdhënëse si për shifrat entuziaste të rasteve të reja,  por edhe për rifillimin e jetës në të gjitha drejtimet. Mesi i qershorit risolli shqetësim, ndërsa në korrik, jo vetëm të gjithë njihnin dikë që ishte me COVID-19, por numri i vdekjeve ishte më i lartë se të katër muajt e tjerë të pandemisë.

Vetëm këtë javë vihet re një ulje e numrit të  rasteve të reja me COVID -19, por nga ana tjetër është shtuar numri i viktimave në moshë të re. Infektimet mbeten gjithsesi të larta dhe kapacitetet e dy spitaleve janë drejt plotësimit. Ministria e Shëndetësisë ka siguruar se po bëhet gati Spitali COVID 3 dhe nëse do të jetë nevoja edhe COVID 4, por ajo që mungon janë mjekët dhe infermierët nëse situata përkeqësohet. Por askush nuk di të thotë nëse Shqipëria e ka kaluar më të keqen.

Madje pritet që gushti do të jetë muaji më i keq sa i përket përhapjes së infeksionit nga Covid-19. Ekspertët parashikojnë shtim të rasteve ditore veçanërisht në Tiranë. Virusi në kryeqytet ka kaluar në transmetim komunitar, ndërsa qytetarët nuk janë ndërgjegjësuar për respektimin e masave mbrojtëse. “Çdo lirim masash nga maji deri tani ka pasur pas 2-3 javësh pikun e të infektuarve dhe shtrimeve në spital dhe terapinë intensive. Edhe kjo periudhë është moment piku dhe do të vazhdojë për 2 javë patjetër”, tha dje Shefi I Urgjencës së QSUT, Skënder Brataj.

Nga fillimi i epidemisë janë prekur nga koronavirusi mbi 5 mijë qytetarë, gjysma e tyre janë të sëmurë aktive, ndërsa 157 janë rastet e humbjeve të jetës.  Tirana është zona më e nxehtë e infeksionit dhe zyrtarisht ka mbi 1 mijë raste aktive, por edhe numrin më të madh të viktimave nga Covid-19.

Ekonomia

Pas parashikimeve pesimiste të Bankës Botërore dhe FMN, vera  tregoi se ato shifra kishin qenë realiste. Edhe shpresa se hapja në mes të majit do të vijonte me rikthimin e jetës, konsumit, turizmit u shua pak nga pak me shtimin e rasteve gjatë korrikut. Turizmi normalisht është i gjunjëzuar, ndërsa turistët e huaj dhe shqiptarët që jetojnë në Itali e Greqi përfundimisht nuk do të vijnë këtë verë. Po kështu veç Turqisë, shqiptarët nuk udhëtojnë dot në asnjë shtet të Europës. Izolimi do të hiqet nëse ulet shkalla e përhapjes së infektimeve që ne e kemi të lartë sipas standardeve të tyre.

Për shkak të pandemisë qeveria u detyrua të ndryshojë 3 herë buxhetin e shtetit, ku për vitin 2020 parashikon rënie të ardhurash buxhetore dhe rritje të shpenzimeve.

Efektet negative nga Covid-19 do të rrisin ndjeshëm deficitin buxhetor, nivelin e borxhit publik, ndërsa rritja ekonomike do të shënojë rënie.

Rritja e deficitit buxhetor me 8,4% dhe e borxhit publik në nivelin 80% të Prodhimit të Brendshëm Bruto është një periudhë e përkohshme e cila vjen si një domosdoshmëri. Në vlerësimin tonë është parashikuar një rritje reale negative prej -4.3% në vitin 2020 e shoqëruar me një rritje të konsiderueshme në 3 vitet e ardhshme dhe si rrjedhojë e zhvillimeve në vend rritjes së investimeve dhe konsumit”, theksoi këtë javë në Kuvend ministrja e Financave.

Por nëse turizmi po kalon nëpër paqartësinë e kësaj vere të pangjarë, në vjeshtë është radha e arsimit në të gjitha ciklet, i cili deri tani nuk dihet nëse do të jetë si para marsit. Po kështu transporti ajror që pothuajse është pezulluar dhe nuk dihet ai ai kur do të rinisë. Baret, restorantet, pishinat, lokalet e jetës së natës janë të tëra të rrezikuara me ardhjen e vjeshtës nëse virusi nuk e ul intensitetin dhe shkallën e rrezikut. Si një vend që mbështesim ekonominë tonë tek shërbimet jemi seriozisht të rrezikuar për të pësuar në rënie dy shifrore ekonomike në skenarin më te keq.

Zgjedhjet si zgjidhje

Mes shumë vështirësive normaliteti i jetës politike nga varet shumëçka në vende si Shqipëria, u vendos në janar të këtij viti, psi Opozita vendosi të rihynte në jetën institucionale. Një vit më parë kishe djegur mandatet e deputetëve në Kuvend. Qysh atëherë, marrëveshje pas marrëveshjesh u krijua një minimum i klimës politike për të shkuar drejt zgjedhjeve së pranverës së ardhshme pa ndonjë frakturë të madhe. 30 qershori i 2019, ku opozita nuk morri pjesë tanimë dukej i largët dhe askush nuk priste që kjo verë të trazohej nga maxhoranca, e cila në krizën politike dhe kushtetuese të pothuaj dy viteve kishte pasur me vetë gjithmonë ndërkombëtarët.

Së fundi kryeministri Rama duke shfrytëzuar opozitën parlamentare pa e pasur fare objektiv hapjen e listave për deputetët dhe gjoja në vështirësi për të bërë 84 vota që duheshin për miratimin e Kodit të ri Zgjedhor të miratuar në Këshillin Politik së bashku me PD e LSI, i ktheu ndryshimet kushtetuese që hapnin listat si prioritet absolut të vetin. Nevoja e 84 votave nuk qëndron, sepse që nga futja e opozitës së re në Kuvend ata kanë votuar si qeveria dhe kanë bërë më shumë vota se aq. Së dyti para votimit në Kuvend të “Marrëveshjes së 5 Qershorit” për të cilën Rama tha se s’ kishte votat, 6 deputetë të opozitës parlamentare deklaruan hapur votat pro, të cilat plotësonin kuorumin e duhur për Kodin Zgjedhor.

Por hapja e listave ishte vetëm fasada për të arritur tek qëllimi i heqjes së koalicioneve parazgjedhore siç kanë qenë që nga 2009. Opozita parlamentare ka që në shkurt 2019 që deklaronte se ishte për hapjen e listave dhe për një vit e gjysmë maxhoranca ishte kundër. Në momentin që Rama dhe maxhoranca kuptoi se nga heqja e koalicioneve, Opozitës së Bashkuar i ikin 2 deri në 3 deputetë, duke marrë për bazë votat e 2017, ai përdori “listat e hapura” si kalë beteje. Opozita parlamentare nuk i hapi listat. Ndryshe nga ç’thonë pjesëtarët e saj ajo thjesht u përdor nga Rama për të hequr koalicionet dhe për të dëmtuar opozitën jashtë Kuvendit. Nëse e kundërta do të ishte e vërtetë, ata nuk do të propozonin në mënyrë qesharake prag elektoral 5% përqind që është kundër tyre, meqë krijuan edhe parti të re dhe nuk do të kërkonin po kështu heqjen e koalicioneve që është sërish kundër tyre.

Pas votimit të djeshëm të ndryshimeve kushtetuese, duket se koalicionet do të ndryshojnë. Ato do të jenë me lista unike. Deri dje opozita jashtë parlamentit nuk ka thënë se çfarë qëndrimi do të mbajë, a do të shkojë në Këshillin Politik për të detajuar në kodin Zgjedhor ndryshimet kushtetuese apo jo, ku ende ka një shans teorik që koalicionet të ruhen siç ishin. Por megjithë vonesën e përgjigjes, opozita nuk do të ripërsërisë bojkotin e 30 qershorit.

Ajo ka dhënë mesazhe se do të shkojë në zgjedhje. Mbetet që PD e aleatët e saj të kalkulojnë taktikën e re elektorale sipas asaj që maxhoranca votoi në mënyrë të njëanshme dhe të mbështet tek kapacitete e veta për programin, listën e kandidatëve dhe rikthimin e shpresës. Zgjedhjet janë e vetmja mënyrë për të hequr pasiguritë politike të verës, ku pas ndryshimit të Kushtetutës, terreni për destabilitet është bërë sërish shumë joshës.

95 viktima dhe 2700 të infektuar, korriku më shumë vdekje dhe raste se 4 muaj pandemi në Shqipëri

Ministria e Shëndetësisë raportoi të premten 3 viktima, 79 raste dhe 69 të shëruar të tjerë nga COVID-19 duke çuar bilancin e pandemisë në vendin tonë në 5,276 raste, 2,952 të shëruar dhe 157 të vdekur.

Drejtoresha e Operatorit të Shërbimeve të Kujdesit Shëndetësor, Mirela Cami, tha në një konferencë për shtyp se viktimat ishin të moshës 90, 76 dhe 56 vjeç nga Elbasani dhe Tirana.

Muaji korrik rezulton kështu muaji më i rëndë i pandemisë në Shqipëri me 95 viktima (60% e totalit) dhe 2,741 raste (51% e totalit) duke tejkaluar të gjitha shifrat e 4 muajve të tjerë që patën 2,535 raste dhe 62 viktima.

Mesatarisht gjatë muajit korrik pati çdo ditë nga 3 viktima, 88 raste të reja dhe 48 të shëruar.

Gjatë konferencës për shtyp Cami kujtoi qytetarët që të mbajnë distancën fizike dhe maskat në mjediset e mbyllura. Ajo njoftoi se situata në spitale mbetet kritike ku ashtu si përgjatë gjithë muajit të shtruarit në spitale kanë mbetur mbi 100.

“Aktualisht në Spitalin Infektiv dhe Spitalin Shefqet Ndroqi, trajtohen 115 pacientë, 16 prej të cilëve në terapi intensive, nga këta 5 janë me frymëmarrje të drejtuar,” – u shpreh Cami.

Autoritetet shëndetësore kryen gjatë 24 orëve 500 teste, duke diagnostikuar 79 persona pozitivë me COVID-19 – shumica prej të cilëve në Tiranë (56), Shkodër (6) dhe Krujë (6).

Po gjatë kësaj periudhe kohore u deklaruan të shëruar 69 qytetarë, duke e çuar totalin e atyre që e kanë mposhtur virusin në 2,952 persona.

Aktualisht mbeten 2,167 persona ende mbartës të virusit, ose siç thuhet në zhargonin mjekësor “raste aktive”. Pjesa kryesore janë në Tiranë (1,191) e Durrës (256), Shkodër (209) ndërsa shqetësuese është situata edhe në Vlorë (94), Fier (83) Lezhë (82), Kukës (65) dhe Korçë (60).

Prej nisjes së pandemisë autoritet kanë kryer 36,993 teste me tamponë dhe 4,206 teste serologjike.

Shqipëria mbetet vendi që kryen më pak teste në rajon me një statistikë prej 13,200 testesh për çdo 1 milionë banorë – 8 herë më pak se Serbia dhe 4 herë më pak se Maqedonia e Veriut.

Dekreton “5 Qershorin”

Meta: Në krye të vullnetit të qytetarëve për të marrë në dorë fatet e tyre

Presidenti i Republikës, Ilir Meta, ka dekretuar dje marrëveshjen e 5 qershorit, e cila u arrit me konsensus të plotë në tryezën e Këshillit Politik, me ndërhyrjen e Shteteve të Bashkuara të Amerikës dhe Bashkimit Evropian. Marrëveshja për ndryshimet në Kodin Zgjedhor kaloi në seancën e 23 korrikut në Kuvend, ndërsa mori pëlqimin e 99 deputetëve.

“Kuvendi i Shqipërisë përmes shkresës Nr.1961 Prot, datë 30.07.2020, ka përcjellë pranë Institucionit të Presidentit të Republikës për dekretim dhe shpallje, ndër të tjera edhe Ligjin nr. 101/2020 “Për disa shtesa dhe ndryshime në ligjin nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar”.Presidenti i Republikës SH.T.Z. Ilir Meta, ashtu siç kishte garantuar, ditën e sotme pa asnjë vonesë ka dekretuar me shpallje Ligjin nr. 101/2020 “Për disa shtesa dhe ndryshime në ligjin nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar”. Ndryshimet në Kodin Zgjedhor janë i vetmi produkt i marrëveshjes konsensuale të 14 Janarit dhe të 5 Qershorit të dakordësuara në Këshillin Politik, që mundëson vijimin e sigurtë të rrugëtimit europian të Shqipërisë dhe që kishin konsensusin dhe gjithëpërfshirjen e të gjithë aktorëve politikë në vend”, thuhet në dekret.

Kreu i shtetit thekson se dialogun politik gjithëpërfshirës, transparent dhe i sinqertë mes forcave politike, është elementi kryesor që sipas tij afron më shpejt Shqipërinë me Bashkimin Europian.

“Presidenti Meta, rithekson edhe një herë se, dialogu politik, gjithëpërfshirës, transparent dhe i sinqertë ndërmjet forcave politike për të gjitha çështjet që prekin zgjedhjet është e vetmja rrugë që e afron Shqipërinë me Bashkimin Europian dhe e bën Reformën Zgjedhore në përputhje me standardet e OSBE/ODIHR, siç ka kërkuar Këshilli Europian në 15 kushtet e vendosura për hapjen e negociatave.Për muaj me radhë Presidenti i Republikës ka përsëritur thirrjen që, çdo ndryshim në lidhje me ligje të rëndësishme, duhet të bëhen vetëm përmes konsensusit unanim të Këshillit Politik”, sqarohet më tej.  Meta ka falënderuar partitë politike për konensusin e treguar për arritjen e kësaj marrëveshjeje, ndërsa siguron qytetarët se do të jetë gjithmonë në mbrojtje të ligjeve dhe kushtetutës së vendit.

“Presidenti Meta, gjen rastin të falenderojë të gjitha ato forca politike që me angazhimin e tyre të sinqertë dhe vullnetin e treguar në Këshillin Politik, mundësuan arritjen e këtij rezultati në 5 qershor që u kodifikua nga Parlamenti i Shqipërisë në datën 23 korrik përmes ndryshimeve në Kodin Zgjedhor, të cilat dekretohen sot. Presidenti Meta do të jetë si gjithmone në krye të detyrës në mbrojtje të Kushtetutës, të të drejtave të patjetërsueshme, lirive dhe vullnetit të qytetarëve për të marrë në dorë fatet e tyre përballë çdo akti të ndryshimeve të njëanshme, të dhunshme dhe me urgjencë të pajustifikueshme, si ai i Kushtetutës, që asgjesojnë shtetin e së drejtës, demokracinë dhe të ardhmen europiane të Shqipërisë!”, thuhet në dekret, të cilin e ka shpërndarë edhe zëdhënësi i Metës, Tedi Blushi./Gazeta Liberale

 

Tags: , , ,

KOMENTO (0)

Shkruaj nje koment

Your email address will not be published. Required fields are marked *

* *

Back