Një 26-vjeçar është arrestuar nga Policia e Tiranës në kuadër të operacionit policor të koduar “Unknown”, ndërsa një 32-vjeçar është shpallur në kërkim.
Sipas burimeve policore, Ervis Belollari i ka kërkuar para një biznesmeni nga Lushnja, i cili merrej me bimë medicinale. I riu është prezantuar si kryetar Bashkie, pa përmendur një emër konkret.
Belollari është i njohur në publik pasi ka marrë pjesë në një serial turk, i titulluar "Osmani".
Nga veprimet hetimore dyshohet se Ervis Belollari dhe Arsen Matollari në bashkëpunim me njëri-tjetrin, kanë përfituar 6000 euro prej biznesmenit.
Njoftimi i policisë:
Specialistët për Hetimin e Krimeve të Komisariatit të Policisë Nr. 6, në vijim të veprimeve hetimore për zbardhjen e një rasti të përfitimit të një shume parash, me anë të mashtrimit, kanë organizuar dhe finalizuar operacionin policor të koduar “Unknown”, si rezultat i të cilit u arrestua shtetasi E. B., 26 vjeç, si dhe u shpall në kërkim shtetasi A. M., 32 vjeç.
Nga veprimet hetimore dyshohet se këta shtetas, në bashkëpunim me njëri-tjetrin, kanë përfituar 6000 euro nga një biznesmen, duke iu prezantuar atij si përfaqësues të drejtuesit të një institucioni vendor.
Vijon puna për kapjen e shtetasit A. M. dhe për dokumentimin e plotë të rastit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
