Qeveria fal gjobat e paekzekutuara të 10 viteve të fundit! Çfarë duhet të dinë qytetarët

Ka hyrë në fuqi vendimi i qeverisë për faljen e gjobave administrative të vendosura nga viti 2015 deri më 30 nëntor 2024, të cilat nuk janë paguar ose ekzekutuar. Kjo do të thotë që shumë qytetarë dhe biznese, sidomos në zonat rurale, nuk do të kenë më detyrimin për të paguar këto gjoba.

Kush përfiton?
Fshirja e gjobave vlen për:

Shtëpi banimi në zona rurale.
Fermerë apo ata që ruajnë e grumbullojnë produkte bujqësore.
Dyqane të vogla apo shërbime të thjeshta.
Aktivitetet që nuk dëmtojnë pronën publike apo mjedisin.
Gjobat e marra gjatë pandemisë COVID-19 (p.sh. për shkelje të orareve apo rregullave të kufizimit të lëvizjes).
Gjithashtu përfshihen dhe gjobat e vendosura nga institucione si:

Tatimet (vendore dhe qendrore)
Bashkitë
Inspektoratet e Punës, Mjedisit, Shëndetit
Autoritetet gjatë periudhës së pandemisë
Çfarë përfitojnë qytetarët?
Fshirje automatike e gjobave të papaguara nga regjistrat tatimorë dhe financiarë.
Lehtësim për të marrë kredi, për të bërë legalizime apo për të aplikuar në projekte e subvencione.
Pastrim i historikut, që do të thotë se nuk do të mbani më një gjobë që nuk e keni paguar.
A duhet të bëjnë qytetarët ndonjë veprim?
Në shumicën e rasteve jo, sepse fshirja do të bëhet automatikisht nga institucionet. Ato kanë afat deri më 15 qershor 2025 për të përgatitur listat.

Por nëse qytetarët nuk shfaqen në listë dhe mendojnë se kanë të drejtë të përfitojnë, duhet të:

Kontaktojnë bashkinë, tatimet ose institucionin që ka vendosur gjobën.
Kërkojnë verifikim nëse gjoba është e përfshirë në vendim.
Nëse nuk janë në listë, të paraqesin një kërkesë me dokumentet që provojnë se gjoba është e paekzekutuar dhe hyn në kategoritë që përfitojnë.
Afati i fundit për të bërë këtë kërkesë është 15 janar 2026.

Kujdes!
Monitoroni komunikimet nga institucionet dhe mbani kontakte me zyrat tatimore apo bashkinë.
Sigurohuni që gjoba është hequr nga sistemi, që të mos ju dalë më në asnjë detyrim.