Ministria e Arsimit ka publikuar sot rezultatet zyrtare të provimit të Gjuhës shqipe dhe Letërsisë, një ndër më të rëndësishmit në Maturën Shtetërore 2025. Të gjithë maturantët kanë tashmë mundësinë të konsultojnë notat e tyre nëpërmjet sistemit digjital, në portalin zyrtar të qeverisë.
Sipas të dhënave të bëra publike, provimin e kanë kryer gjithsej 25,712 maturantë, prej të cilëve 365 kanë marrë notën 4.00, duke mos arritur të kalojnë testin. Ndërkohë, 29 nxënës kanë arritur të marrin notën maksimale 10.00, duke u shpallur ekselentë.
Kalueshmëria e përgjithshme është 98.58%, një tregues i lartë i performancës së përgjithshme të maturantëve në këtë provim, ndërsa nota mesatare e këtij testi është 6.87, duke reflektuar një nivel mesatar të arritjeve.
Ministria ka njoftuar gjithashtu se brenda pak minutash do të publikohen edhe statistikat e detajuara sipas 12 qarqeve të vendit, përfshirë notat mesatare për secilin qark dhe përqindjen e kalueshmërisë rajonale.
