Tiranë
Është hapur zyrtarisht thirrja për ndërtimin e Bibliotekës së Re Kombëtare, një projekt i shumëpritur që pritet të transformojë peizazhin kulturor të kryeqytetit.
Objekti i ri do të ndërtohet në rrugën “Gramoz Pashko”, në zonën e njohur më parë si “Vilat Gjermane”.
Sipas njoftimit zyrtar të Korporatës Shqiptare të Investimeve dhe AKPT-së, kjo ndërtesë do të jetë një zhvillim multifunksional, i projektuar për të përmbushur standardet më të larta të arkitekturës dhe funksionalitetit.
Biblioteka e re synon të ofrojë një hapësirë moderne për qytetarët, ku dija, kultura dhe inspirimi do të bashkëjetojnë për brezat e ardhshëm.
Me një dizajn bashkëkohor dhe kushte dinjitoze, ky projekt është një tjetër hap në vizionin “Shqipëria 2030”, për transformimin e qëndrueshëm dhe gjithëpërfshirës të vendit.
Ky investim i rëndësishëm publik pritet të jetë një pikë referimi për kulturën dhe edukimin në Shqipëri, duke shërbyer jo vetëm si bibliotekë, por edhe si qendër komunitare dhe zhvillimi intelektual.
