Rusia duhet të ndalojë përpjekjet e saj për të rekrutuar serbët që të luftojnë për grupin e saj paraushtarak Wagner në Ukrainë, ka thënë presidenti serb Aleksandar Vuçiq në një kritikë të rrallë ndaj Moskës.

Vuçiq kritikoi faqet e internetit të Rusisë dhe grupet e mediave sociale për publikimin e reklamave në gjuhën serbe në të cilat grupi Wagner thërret vullnetarët që t'i bashkohen radhëve të tij.

“Pse ju, nga Wagner, telefononi dikë nga Serbia kur e dini se kjo është kundër rregulloreve tona?” ka thënë Vuçiq. Legjislativi serb ndalon pjesëmarrjen e qytetarëve të saj në konfliktet jashtë vendit dhe disa persona janë dënuar për këtë.

Vullnetarët serbë morën pjesë në luftime së bashku me forcat pro-ruse në Ukrainë në 2014 dhe 2015. Askush nuk ka një ide të qartë të numrave të saktë në çdo kohë, por dhjetëra serbë janë regjistruar për të luftuar në Ukrainë që nga viti 2014, thonë vëzhguesit.

Bashkimi Europian ka qenë kritik ndaj Serbisë duke kërkuar që të mbajë një qëndrim të qartë kundër luftës në Ukrainë, si dhe të vendosë sanksione, ashtu siç ka ndodhur me vende të tjera, gjë që është kundërshtuar nga Aleksandar Vuçiq.

Kujtojmë që një ish-komandant i grupit mercenar rus Wagner ka thënë se ai ka ikur në Norvegji dhe po kërkon azil nga frika për jetën e tij, pasi dëshmoi vrasjen e dezertorëve të kapur nga Wagner.

Andrei Medvedev, i cili iu bashkua grupit korrikun e kaluar me një kontratë katër-mujore dhe thotë se luftoi në Ukrainë, tha në një video të postuar nga grupi i të drejtave të Gulagu.net se ai kishte kaluar kufirin në Norvegji përpara se të arrestohej nga policia norvegjeze./Liberale.al