Një operacion i skuadrës antidrogë të Policisë italiane në Piza ka çuar në sekuestrimin e një sasie të konsiderueshme kokaine dhe arrestimin e një 31-vjeçari shqiptar. Ngjarja ndodhi gjatë një kontrolli të zakonshëm trafiku pranë zonës Crespina Lorenzana, ku policia dyshoi për sjelljen e dyshimtë të një automjeti që po lëvizte në rrugë dytësore, të pazakonta për atë orar.

Pas ndalimit të automjetit, shoferi shqiptar shfaqi shenja nervozizmi dhe nuk dha një shpjegim të besueshëm për itinerarin e tij. Gjatë kontrollit, oficerët gjetën në ndarjen e pasagjerëve një distinktiv magnetik pa shenja dalluese, që ngriti më tej dyshimet mbi aktivitetin e tij.

Falë përvojës dhe vëzhgimit të hollësishëm, policët zbuluan një mekanizëm të sofistikuar elektronik, të fshehur në panelin e kontrollit të automjetit, që aktivizohej me një kartë magnetike. Ky sistem hapte një vend të padukshëm në pjesën plastike të makinës, ku u gjetën 6 blloqe kokaine me peshë totale 5.9 kilogramë.

Kontrolli u shtri më pas edhe në banesën e të dyshuarit në Cascina, ku u gjetën 6,800 euro në para të gatshme, si dhe pajisje për përpunimin dhe paketimin e lëndës narkotike – dëshmi të qarta të përfshirjes së tij në trafikun e drogës.

Policia italiane vijon hetimet për të zbuluar nëse i arrestuari është pjesë e një rrjeti më të gjerë trafikantësh. Sasia e sekuestruar konsiderohet e madhe dhe e destinuar për tregun lokal dhe më gjerë. Arrestimi u bë i mundur falë vigjilencës dhe profesionalizmit të strukturave të anti-drogës në rajonin e Pizës.