Në prag të zgjedhjeve të 11 majit, një ngjarje e denoncuar në fshatin Podgorie, Maliq, ka tërhequr vëmendjen e opinionit publik. Kandidati i PD-së, Edmond Spaho, publikoi dy video në rrjetet sociale ku një i ri nga fshati pretendonte se i ishin ofruar para në këmbim të votës. Ky denoncim shkaktoi reagime të menjëhershme, përfshirë një mohim publik nga kandidati i PS-së, Arian Jaupllari, dhe deklarata nga familjarët e të riut, të cilët e cilësuan situatën si presion psikologjik dhe manipulim.

Pas këtyre denoncimeve, Drejtoria Vendore e Policisë Korçë nisi hetimet për të verifikuar akuzat. Në përfundim të hetimeve, policia konkludoi se nuk kishte prova që mbështesnin pretendimet për blerje votash. Nga analiza e pamjeve dhe dëshmitë e mbledhura, nuk u konstatua asnjë veprim i paligjshëm nga ana e kandidatit të PS-së apo personave të tjerë të përfshirë.

Megjithatë, hetimet zbuluan se shtetasi A.P., 34 vjeç, banues në Podgorie, kishte realizuar regjistrimin e videove dhe kishte refuzuar të dorëzojë pajisjen me të cilën u krye regjistrimi për ekspertim, duke penguar hetimin. Për këtë arsye, ai është proceduar penalisht për veprën penale “Veprime që pengojnë zbulimin e së vërtetës”