Kanye West, i njohur gjithashtu si Ye, u rikthye në skenë me një koncert në Shanghai më 12 korrik, duke mbledhur një stadium plot me rreth 70 mijë fansa. Megjithatë, performanca e tij nuk kaloi pa polemika dhe kritika të ashpra.
Koncerti u përball me probleme të shumta, duke filluar nga një shi i rrëmbyeshëm dhe një vonesë 45-minutëshe për shkak të çështjeve teknike. Por problemi kryesor ishte reagimi i fansave, të cilët shprehën zhgënjimin e tyre për performancën e artistit.
Në rrjetet sociale u përhapën video ku Ye akuzohet për përdorim të lip-sync-ut dhe mungesë energjie në skenë. Madje, shumë nga pjesëmarrësit u ankuan se mikrofoni ishte thuajse i padëgjueshëm gjatë gjithë shfaqjes. Çmimet e biletave, që varionin nga 980 deri në 2680 juan (rreth 102–278 paund), shtuan pakënaqësinë e fansave, të cilët kërkuan në kor rimbursim.
Pika më e debatueshme e koncertit ishte momenti kur Kanye u zhduk nga skena për më shumë se 20 minuta në fund të shfaqjes, ndërkohë që këngët e tij vazhdonin të dëgjoheshin në sfond, pa asnjë shpjegim për mungesën e tij.
