Policia ka gjetur në lumin Shkumbin armën e zjarrit pistoletë, e cila dyshohet se u përdor nga 18-vjeçari Horgito Peqini për të vrarë 33-vjeçarin Madrit Ulqinak.
Blutë bëjnë me dije se policia ka sekuestruar armën e zjarrit me një krehër me 6 fishekë në të, të cilat u gjetën pas kërkimeve intensive nga ana e shërbimeve, në shtratin e lumit Shkumbin.
Po ashtu, mbrëmjen e djeshme u arrestua edhe autori, pas negocimit edhe me familjarët.
“Si rezultat i kontrolleve të shumta të zhvilluara nga Policia e Elbasanit, si dhe i negocimeve me familjarët, u bë e mundur vënia në pranga e shtetasve H. P., 18 vjeç dhe K. S., 33 vjeç, pasi Gjykata e Shkallës së Parë Elbasan ka vendosur masën e sigurisë “Arrest në burg”, për këta shtetas, për veprat penale “Vrasja me dashje”, kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”.
Nga tërësia e veprimeve hetimore ka rezultuar se këta shtetas, në bashkëpunim me njëri-tjetrin, dyshohet se kanë vrarë, për motive të dobëta, me armë zjarri, shtetasin M. U., mbrëmjen e datës 17.08.2022”, thuhet në njoftimin e Policisë.
