Një ngjarje e rëndë ka ndodhur në qytetin Alblasserdam të Holandës, ku një mësues 53-vjeçar është plagosur rëndë me thikë brenda një qendre kulturore të një shkolle fillore.
Sipas policisë, ngjarja ndodhi gjatë një aktiviteti ku mësuesi u përpoq të ndalonte një debat të ashpër mes tre burrave. Gjatë ndërhyrjes, ai u godit me thikë përpara disa dëshmitarëve. Disa prej tyre kanë marrë ndihmë psikologjike për shkak të tronditjes.
Policia ka arrestuar tre persona të dyshuar për përfshirje në incident. Njëri prej tyre, 44 vjeç, u ndalua menjëherë në vendin e ngjarjes, ndërsa dy të tjerët u paraqitën më vonë në një spital në Rotterdam. Njëri ishte i plagosur, ndërsa tjetri tentoi të largohej, por u kap nga policia.
Hetimet janë ende në vijim dhe autoritetet kanë sekuestruar dy automjete që dyshohet se lidhen me ngjarjen. Motivi i konfliktit mbetet ende i paqartë.
