Kryesore

Në gjyq për “Detin”

               Publikuar në : 09:16 - 17/09/20 liberale

Ndarja e kufirit detar mes Shqipërisë dhe Greqisë mund të shkojë në gjykatë ndërkombëtare ose të zgjidhet me ndërmjetësimin e një pale të tretë.  Kryeministri flet edhe për rëndësinë e heqjes së Ligjit të Luftës, i cili hap rrugën për zgjidhjen e çështjes së pronave të popullsisë çame, gjë që qeveria greke nuk e raporton si pjesë e diskutimeve   

Vizita dyditore e kryeministrit Rama në Greqi pati një përfundim publik, jo pak të rëndësishëm për të dy vendet, siç ishte ai i propozimit për ndarjen e kufirit detar me ndërmjetësimin e një pale të tretë ose në një gjykatë ndërkombëtare.

Lajmin e dha Kryeministri Rama në forumin e “The Ecomonist” në Athinë, ku u shpreh se çështja e detit mund të zgjidhet me gjykatë ndërkombëtare, në mënyrë që të mos përdoret nga patriotët. Çështje të kaluara janë kthyer në patate të nxehtë tha Rama. “Unë kam një ide, që e kam paraqitur dhe shpresoj që sa më shpejt ta arrijmë këtë. Kur bëhet fjalë për zonat detare ne ta mund ta zgjidhim çështjen me ndihmën e të tjerëve. Nëpërmjet një pale të tretë, apo nëpërmjet gjykatave ndërkombëtare. Kjo mund të jetë e drejtë objektive dhe nuk mund të përdoret nga patriotët”-tha ai, duke treguar kështu s negociatat dy vjeçare mes dy vendeve jo vetëm që janë ndërprerë por edhe nuk kanë arritur dot kompromis të pranueshëm.

Nuk dihet cili është mendimi i palës greke për këtë rrugëzgjidhje por ajo që tha dje ish ministrja e Jashtme greke gjatë kohës që u firmos marrëveshja e 2009-tës, Dora Bakojanis ishte larg pranimit. Ajo u shpreh se ndërhyrja e një pale të tretë nuk ndihmon.

Rama dhe Bakojanis patën ndërkohë edhe një shkëmbim replikash për autorët e rrëzimit të marrëveshjes së 2009-ës. “Jam unë ajo që kam nënshkruar këtë marrëveshje, u mërzita shumë kur mora vesh vendimin e Gjykatës Kushtetuese. Me vjen keq që pas kaq vitesh nuk kemi një marrëveshje mes dy vendeve. Për të qenë e sinqertë që ndërhyrjet e palëve të treta në këtë marrëveshje ka qenë e madhe. Të gjithë e dimë që Turqia nuk e ka dashur këtë marrëveshje. Unë njihem në Greqi si një nga mbështetësit e dialogut mes Greqisë dhe Turqisë. Shpresoj që presidenti Erdogan do bëj të gjitha përpjekjet e nevojshme që të mos përshkallëzojë tensionet dhe të ndryshojë retorikën. Unë e njoh prej vitesh dhe ai duhet të kuptojë se kjo nuk është një mënyrë e suksesshme për të bërë politike. Duhet ti kthehemi tryezës së dialogut. Ti drejtohemi Gjykatës ndërkombëtare për këtë çështje. Unë shpresoj që kjo çështje është e qartë dhe i shumicës së vendeve të Mesdheut, shpresoj që fryma mes tre vendeve të mbizotërojë”, tha ajo.

Ndërkohë Rama replikoi duke i thënë se Ne jemi në partneritet strategjik me Greqinë dhe Turqinë. Shqipëria nuk është mes dy zjarreve. Unë besoj që ka absolutisht në këtë marrëdhënie që të bëhet e dobishme edhe për Europën sepse Turqia është është kyçe për sigurinë e Europës. Presidenti turk nuk është një politikan anti-grek dhe nuk ka dyshim që e shkuara ka treguar që kur ka një vullnet, ka dhe zgjidhje, dialog i mirëfilltë. Asgjë nuk është e lehtë, por gjithçka mundur. Në 2009 asnjëherë nuk e kisha takuar dhe folur prej presidentit Erdogan, nuk kishim asnjë raport dhe vendosëm që marrëveshjen ta çonin më Gjykatë për një arsye shumë të thjeshtë, kishte një debat në opinionin publik, Kjo është një marrëveshje që është parandaluar nga ndërhyrja e Turqisë. Kjo është e pavërtetë dhe mund ta hedh, asnjëherë në asnjë takim me presidentit Erdogan nuk kam dëgjuar prej tij që kjo marrëveshje ka ndonjë interes për Turqinë. Kjo është e vërteta.  I jam shumë mirënjohës Mitsotakis dhe Dendias sepse kanë pasur një qëndrim shumë konstruktiv dhe e kanë shfaqur vullnetin pa u dashur që të kthehemi pas sikur nuk ka ndodhur asgjë, por duke vlerësuar situatën aktuale dhe duke pasur një mendje të qartë. COVID në spitale ne kemi shqiptar dhe njerëz nga pakicat greke po përballen me të njëjtin rrezik na duhet që t’i shohim popujt tanë në vendin e gjithsecilit si një thesar dhe duhet ta ruajmë këtë potencial të jashtëzakonshëm”.

Ligji i Luftës

Tema e Ligjit të Luftës, ndoshta tema më e vështirë në mes Shqipërisë dhe Greqisë nuk u raportua zyrtarisht nga palët specifikisht si pjesë e bisedës, megjithëse u tha se ishte folur për të gjitha problemet. Publikisht Rama zgjidhi ta prekë atë në takimin me emigrantët shqiptarë, duke qenë i çliruar nga detyrimet e përbashkëta për qëndrimet zyrtare.

“I vetmi mesazh që unë i kam dhënë është që politikën e madhe e bëjmë ne, ti ke prioritet shqiptarët në Greqi. Me Greqinë kemi marrëdhënie të mirë. Kemi ende për të trajtuar disa çështje. Ende sot në mënyrë absurde është në fuqi me Greqinë një ligj lufte i Greqisë. Heqja e ligjit të luftës është gur themeltar për të hapur një epokë të re sepse heq të gjithë mjegullën nga e cila përfitojnë lloj-lloj ujqërish dhe hienash. Faktikisht hap rrugën për të gjitha çështjet e pronësisë që do zgjidhen në mënyrë ligjore, gjyqësore kombëtare ose ndërkombëtare”-tha Rama, i cili mbylli vizitën dy ditore në Athinë pasi të hënën ishte në një takim me Presidentin turk Erdogan.

Media turke: Ne rrëzuam marrëveshjen detare Shqipëri-Greqi

Mediat turke kanë reaguar sërish në lidhje me negociatat për detin mes Shqipërisë dhe Greqisë duke risjellë në vëmendje rrëzimin e marrëveshje së vitit 2009 nga Gjykata Kushtetuese. Madje, mediat turke theksojnë se ishte ndërhyrja e autoriteteve të Turqisë ajo që çoi në rrëzimin e marrëveshjes së detit “duke i dhënë kështu fund planeve të Greqisë në detin Jon“.

“HaberTurk”, media pranë qeverisë në Turqi i rikthehet sot këtij episodi të vitit 2009 duke theksuar se autoritetet turke njoftuan autoritetet shqiptare duke iu thënë tekstualisht se “Greqia po ju mashtron”.

Ndër të tjera, HaberTurk shkruan:

Ekspertët konfirmojnë se Greqia synoi të përdorë të njëjtën skemë edhe me Shqipërinë, duke i njohur ishujve shumë pranë territorit një Zonë Ekskluzive Ekonomike të barabartë me tokën. Përballë kësaj situate ne njoftuam palën shqiptare duke bërë që Greqia të mos marrë asnjë rezultat nga një tentativë e tillë. Pas anulimit të marrëveshjes me Shqipërinë, Greqia ktheu sytë nga zona detare në jug të Kretës duke kërkuar për gaz.

HaberTurk i referohet një interviste të dhënë nga Admirali turk Cihat Yayci, i cili është edhe arkitekti i planit “Atdheu Blu”, përmes të cilit Turqia shpall Zonë Ekskluzive Ekonomike në një pjesë të mirë të Egjeut.

Në intervistën dhënë HaberTurk-ut në qershor të këtij viti, Yayci është më i drejtpërdrejt në këtë drejtim duke theksuar: Ne e njoftuam palën shqiptare duke iu thënë se “Greqia po i mashtronte”. Në fund, edhe pse marrëveshja u nënshkrua, Shqipëria i tha Greqisë se “ishujt e tu nuk mund të kenë të njëjtin ndikim në Zonën Ekskluzive Ekonomike me tokën time” duke e çuar marrëveshjen në Gjykatën Kushtetuese, e cila e rrëzoi.

Gjithçka nga media pro qeveritare turke rikthehet pas debatit mes kryeministrit Rama dhe firmëtarës së marrëveshjes së detit me Greqinë, të rrëzuar, Dora Bakojanis.

Vizita e Ramës në Greqi e Turqi, Pollo: Propagandë jashtë kufijve

Ish-deputeti i Partisë Demokratike, Genc Pollo, ka komentuar vizitat e fundit të kryeministrit Edi Rama në Turqi dhe Greqi, teksa shprehet se po ndërton arritje imagjinare diplomatike.

Ai e konsideron kryeministrin si një cirk lëvizës që herë buzëqesh me çajin përpara në Turqi dhe herë pozon si lider global në Athinë.

Reagimi i plotë

Propagandë e vetëm propagandë edhe kur kalon kufijtë e Shqipërisë. Pas deshtimit me video montazhe ne vend i gënjen mendja se njësoj siç ndërtoi projekte imagjinare me 3D për të fshehur dështimin e qeverisjes, do të ndërtojë edhe arritje imagjinare diplomatike.

I pandashëm nga propaganda e gënjeshtra, Rama duket thjesht si një cirk lëvizës që herë buzëqesh me çajin përpara në Turqi dhe herë pozon si lider global në Athinë. Askush nuk i ka harruar premtimet dhe zotimet e tij që e bëjnë qesharak përpara e Europës që gjithnjë e më shumë e ka mbyllur në kafazin e harresës.

Varfëria, kriza ekonomike dhe mungesa e nje plani konkret per përballimin e pandemisë janë e vërteta qe dhemb dhe qe rendon ne kurrizin e shqiptareve. E që nuk e zgjidhin dot shëtitjet dhe e farfuritjet diplomatike te Edi Ramës! /Gazeta Liberale

 

Tags: , , , ,

KOMENTO (0)

Shkruaj nje koment

Your email address will not be published. Required fields are marked *

* *

Back