Ministria e Brendshme e Gjermanisë publikoi projektligjin që synon ta bëjë më të lehtë për njerëzit që të aplikojnë për shtetësi, pasi Berlini kërkon të nxisë migrimin dhe të hapë tregun e punës në ekonominë më të madhe të Evropës.
Drafti propozon një opsion të shtetësisë së shumëfishtë dhe shkurton kohën e kërkuar të qëndrimit në pesë ose tre vjet nga tetë të mëparshmet.
Kërkesat e gjuhës gjermane për shtetësinë do të lehtësohen gjithashtu për anëtarët e të ashtuquajturit brezi "Gastarbeiter", shumë prej tyre turq, të cilët erdhën në Gjermani në vitet 1950 dhe 60 si punëtorë migrantë.
"Ne duam që njerëzit që janë bërë pjesë e shoqërisë sonë të jenë në gjendje të ndihmojnë në formimin e vendit tonë në mënyrë demokratike," tha në një deklaratë Ministrja e Brendshme Nancy Faeser, duke shtuar se shembujt nga vende si Kanadaja tregojnë se kjo perspektivë ishte vendimtare për të tërhequr punëtorët e kualifikuar që i duhen Gjermanisë.
Qeveria gjermane ra dakord vitin e kaluar mbi planet për të reformuar ligjin e saj të imigracionit, pasi Berlini kërkon të hapë tregun e punës për punëtorët shumë të nevojshëm nga jashtë Bashkimit Evropian, me qëllim për të plotësuar qindra mijëra vende të lira pune në sektorë nga gastronomia dhe kujdesi për fëmijët te IT dhe energjia e rinovueshme.
Në fund të vitit 2021, rreth 72.4 milionë qytetarë me shtetësi gjermane dhe rreth 10.7 milionë me shtetësi të huaj jetonin në Gjermani, nga të cilët rreth 5.7 milionë kishin shkuar në Gjermani për të paktën 10 vjet. Kujtojmë se në 10 vitet e fundit në Gjermani kanë emigruar një numër i konsiderueshëm nga Shqipëria për të punuar dhe jetuar në vendin më të zhvilluar të Europës. Ligji i ri pritet të inkurajojë të tjerë të largohen dhe të rrisë rrezikun e boshatisjes së Shqipërisë, sidomos për moshat që janë aktualisht në krah pune.
/Liberale.al/
