Ish-deputeti i Kuvendit të Kosovës, Gramos Agusholli, është liruar pasi u ndalua nga autoritetet serbe në pikën kufitare në Merdarë, gjatë udhëtimit të tij tranzit për në Slloveni.
Zyra Ndërlidhëse e Republikës së Kosovës në Serbi njoftoi se për këtë rast janë informuar edhe misionet diplomatike të vendeve të KUINT-it dhe Zyra e Bashkimit Evropian në Beograd.
Ministria e Punëve të Jashtme dhe Diasporës bëri të ditur se z. Agusholli është liruar dhe ka vazhduar rrugën për në destinacionin e tij në Slloveni.
Në njoftimin e ministrisë thuhet gjithashtu se MPJD do të vazhdojë të ndjekë me kujdes çdo situatë që shkel të drejtat e qytetarëve të Kosovës. Ministria i kërkon Bashkësisë Ndërkombëtare që të reagojë ndaj Serbisë dhe të ndalojë veprime të tilla represive, që janë në kundërshtim me të drejtën ndërkombëtare dhe konventat për të drejtat e njeriut.
Gramos Agusholli ka shërbyer më herët si deputet i Lëvizjes Vetëvendosje.
