Entuziazmi i tepruar për futbollin argjentinas mes banorëve të Bangladeshit është përtej imagjinatës dhe i afrohet realitetit çdo katër vjet gjatë Kupës së Botës, shfaqjes më të madhe në planet.
Rrugët dhe shtëpitë janë stolisur me flamuj bojëqielli dhe të bardhë, shitja e fanellave të Argjentinës ka arritur kulmin, thashethemet dhe diskutimet janë kryesisht për futbollin dhe kur transmetohen ndeshjet e Argjentinës në ekranin e madh sheshet janë gjithmonë të mbushura plot me futbolldashës.
Edhe këtë herë me Botërorin e Katarit nuk kishte si të ndodhte ndryshe. Faqja zyrtare e FIFA-s që shpërndau një video virale të tifozëve të Argjentinës të cilët festojnë në mënyrë të çmendur golin e Lionel Messit kundër Meksikës, është vetëm një paraqitje e shkurtër e çmendurisë së përgjithshme në këtë vend. Megjithatë, çmenduria apo shfaqja e dashurisë për Argjentinën, filloi shumë përpara se Kupa e Botës 2022 të niste në Doha të Katarit, më 20 nëntor.
Diego Maradona dhe ‘Co’ mahnitën botën e futbollit me performancën magjike, kur ngritë trofeun e artë që frymëzoi një grup masiv tifozësh në Bangladesh. Kjo ishte gjithashtu hera e parë që kanali i vetëm televiziv në vend, BTV, pati mundësinë për të bërë biznes real pasi të gjitha ndeshjet me eliminim direkt u shfaqën drejtpërdrejt, si dhe disa ndeshje të përzgjedhura nga faza e grupeve. Triumfi i vitit 1986 krijoi mjaft bujë në të gjithë vendin, që nga ceremonia e hapjes teksa Maradona kapi titujt e para në gazetat lokale.
I tërë populli i Bangladeshit në botërorin e vitit 1986, njerëzit e të gjitha moshave mbetën të magjepsur nga gjeniu dhe kapiteni Argjentinës. Dy golat e tij ndaj Anglisë bënë që Bangladeshi prej asokohe të kthehet i tërë në mbështetje të Argjentinës, duke qenë se vendi aziatik vuante shfrytëzimin si koloni e britanikëve.
Futbollistët bangladeshas janë edhe më aktivë duke treguar mbështetjen e tyre ndaj skuadrave të preferuara, veçanërisht Argjentinës, duke veshur fanellën dhe duke i postuar ato në rrjetet sociale. Sabina Khatun, kapitenja dhe anëtarja më me përvojë e kombëtares, është një tifoze e zjarrtë e Argjentinës që nga viti 2014.
Ajo tha se rreth 60-70% e lojtarëve të kombëtares mbështesin Argjentinën. – “Në thelb ne mbështesim futbollistët”, tha Sabina për Dhaka Tribune. “Kur fillova të kuptoj futbollin, më pëlqeu Argjentina për shkak të Messit. Më pëlqen edhe Neymar”. – “Ne, populli i Bangladeshit, i duam sportet dhe kur vjen Kupa e Botës, është e qartë se në fakt jemi të çmendur pas futbollit.”
Ndërsa Argjentina mori fitoren e saj vendimtare 2-0 në Kupën e Botës ndaj Polonisë, mijëra tifozë shpërthyen në festime në Bangladesh të enjten në orët e para të mëngjesit, me orën e tyre lokale.
Nga fëmijët e vegjël deri te pensionistët, shumica të veshur me ngjyrat blu e të bardhë ose duke valëvitur flamujt argjentinas. Turmat ndoqën gjithë ndeshjen në ekranet gjigante në sheshin kryesor të Universitetit të Dhakës të kryeqytetit. Fuqia e futbollit latin — dhe sulmuesi yll Lionel Messi — duket se kanë fituar pëkrahjen e një “kolonie” në vendin e Azisë Jugore. Nuk janë pak por një vend me 170 milionë banorë.
Rreth 12,000 njerëz ishin mbledhur në sheshin kryesor të kryeqytetit, ndonëse ora ishte 2 pas mesnatës.
Thousands of Bangladeshi Argentina fans watching Arg vs Poland match..@ARG_soccernews @AlbicelesteTalk @FinoYossen @OhMyGoalUS @afa @FIFAWorldCup @ESPNFC @SofascoreINT @goal @BleacherReport #FIFAWorldCupQatar2022 #FIFAWorldCup #ARGvsPOL #Argfans pic.twitter.com/yZRD3bsLru
— Durjoy Chowdhury (@I_mDurjoy143) December 2, 2022
Studenti Tawsif Imran tha se kishte ardhur me miqtë për të parë lojtarin e tij të preferuar, Messi, duke luajtur në Kupën e tij të fundit të Botës. “Kur isha i ri, babai im më thoshte se Argjentina është një ekip i madh. Por kur u rrita dhe më në fund fillova të kuptoj futbollin, u bëra një tifoz i madh i Messit,” i tha ai AFP-së gjatë pushimit të pjesës së parë.
“Shpresoj se do të fitojmë, ai (Messi) e meriton”, shtoi ai. Më herët, pasi Messi humbi një penallti, turma brohoritëse ra në heshtje. Por kur Alexis Mac Allister shënoi golin e parë, kampusi shpërtheu me festë e fishekzjarre. Një tjetër tifoz i Argjentinës, Shamsul Arefin, tha se ishte dita e tij e tretë që shikonte ndeshjet e Kupës së Botës në ekranet gjigante.
“Me dëshirën e Zotit, ne do të shkojmë deri në finale dhe përfundimisht do të fitojmë (Kupën e Botës)”, tha ai. Kakofonia arriti në ethe kur Julian Alvarez shënoi golin e dytë të skuadrës në minutën e 67-të. Festa shpërtheu kudo nëpër kryeqytet, por edhe në qytetet e tjera të Bangladeshit.
Përfundimi i ndeshjes konfirmoi se Argjentina kishte arritur kualifikimin, pavarësisht humbjes me Arabinë Saudite në ndeshjen e parë. Tifozët nga Bangladeshi të Brazilit, të cilët shpesh përfshihen në debate që variojnë nga miqësore në të dhunshme me homologët e tyre argjentinas, mblidhen gjithashtu – për të mbështetur rivalët e tyre.
“Unë jam një tifoz i Brazilit. Por miqtë e mi tifozë të Argjentinës më sollën këtu sot. Ata më falënderuan. Shpresoj për një përballje Brazil-Argjentinë në gjysmëfinale,” tha biznesmeni Rashidul Islam.
Humayun Kabir, një shitës rrobash, i tha AFP-së se shitjet e tij të fanellave të skuadrave kishin qenë suksesi i tij i madh gjatë finaleve të Kupës së Botës. “Po bëj më shumë para se çdo sezon tjetër”, tha ai me një buzëqeshje të gjerë, duke shpjeguar se si tifozët vendas donin të ndiheshin pjesë e emocionit.
Argjentina do të luajë kundër Australisë në fazën e 16-të të dielën. – “Ne patjetër do të vijmë dhe do të bëjmë tifo për Messin,” tha Humaira Tasneem, një studente e universitetit të Dhakës. /Liberale.al/
