Zonja e Parë e Turqisë, Emine Erdoğan u takua sot me Linda Rama, bashkëshorten e kryeministrit shqiptar Edi Rama.
Pasi diskutoi për vlerat e përbashkëta kulturore midis Shqipërisë dhe Turqisë, dy zonjat bënë një tur në vilën 30, ku bashkëshortja e kryeministrit Rama e informoi Emine Erdogan për historinë e saj.
Më pas në një postim në llogarinë e saj në rrjetet sociale, Zonja e Parë ka ndarë mesazhin në lidhje me takimin:
“Në kuadër të vizitës sonë zyrtare, u takuam në Tiranë me zonjën Linda Rama, bashkëshorten e nderuar të Kryeministrit të Shqipërisë.
Ne diskutuam për çështje që do të forcojnë më tej lidhjet historike dhe kulturore midis dy vendeve tona. Është besimi ynë i përbashkët se marrëdhëniet mes vendeve tona do të thellohen me vizita dypalëshe”.
Theksojmë se gjatë ditës së sotme Presidenti i Turqisë, Rexhep Tajip Erdogan, ka nisur një vizitë disa orëshe në Tiranë, e cila do të mbyllet me inaugurimin e xhamisë së Namazgjasë në Tiranë, më e madhja në rajonin e Ballkanit.
