Deputetët e Kuvendit të Kosovës do të tentojnë sërish sot të konstituojnë legjislaturën e re, në një përpjekje që shënon herën e 24-t që parlamenti mblidhet pa arritur të zgjedhë kryetarin e Kuvendit.

Seanca është parashikuar të nisë në orën 10:30, por mbetet e paqartë nëse do të arrihet kuorumi i nevojshëm për të ngritur një komision që do të mundësonte votimin me procedurë të fshehtë për kryetarin e ri.

Përplasjet politike mes partive kanë penguar përparimin, ndërsa palët vazhdojnë të akuzojnë njëra-tjetrën për bllokadën. Lëvizja Vetëvendosje ka propozuar Albulena Haxhiun për kryeparlamentare, por ajo nuk ka siguruar mbështetjen e shumicës. Kandidatura e saj shihet si përçarëse nga PDK dhe AAK, të cilat nuk e kanë mbështetur.

Ndërkohë, lideri i Nismës Socialdemokrate, Fatmir Limaj, ka konfirmuar një takim me Glauk Konjufcën e Vetëvendosjes më 27 maj, duke theksuar se partia e tij është e gatshme të japë kontribut në Kuvend, por një marrëveshje konkrete për zgjidhjen e ngërçit ende mungon.

Kosova mbetet kështu në një situatë të zgjatur bllokade institucionale, ndërsa qytetarët dhe partnerët ndërkombëtarë ndjekin me shqetësim zhvillimet.