Policia e Kosovës ka arrestuar Nikolla Vujoviç, një qytetar nga komuniteti serb. Ministria e Brendshme njoftoi se Vujoviç i është hequr edhe shtetësia, sepse është punësuar në Policinë e Serbisë, gjë që sipas tyre rrezikon sigurinë e Kosovës.
Nikolla Vujoviç është dërguar në kampin e azilantëve në Prishtinë dhe tani po pret të ekstradohet.
Ministri i Brendshëm në detyrë, Xhelal Sveçla, tha se Vujoviç është privuar nga shtetësia për shkak të cenimit të sigurisë kombëtare. Ai nuk dha më shumë detaje për rastin apo për arrestimin e Vujoviçit.
