Deputetët e Kuvendit të Kosovës kanë dështuar për të 49-ën herë me radhë në përpjekjen për të konstituuar parlamentin pas zgjedhjeve parlamentare të 14 shkurtit.

Seanca e fundit u zhvillua këtë të shtunë, ndërsa pritet një takim ndërmjet Albin Kurtit, kryetarit të Lëvizjes Vetëvendosje (LVV), dhe Fatmir Limajt, kreut të Nismës Socialdemokrate, në përpjekje për të dalë nga ngërçi politik.

Nisma kërkon që Fatmir Limaj të emërohet kryeparlamentar, ndërsa LVV të udhëheqë qeverinë, duke e konsideruar këtë si zgjidhjen e vetme për formimin e institucioneve.

Para seancës, deputetja e Nismës Socialdemokrate, Xhevahire Izmaku, deklaroi për mediat se pret që takimi ndërmjet dy liderëve të zhvillohet gjatë ditës dhe se shpreson për vullnet politik nga Albin Kurti.

“Ne presim që sot të zhvillohet takimi. Jemi në afatet e fundit kushtetuese. Unë pres një sinjal pozitiv nga ky takim, që besoj që sot do të ndodhë, dhe vullnet politik nga lideri i LVV-së,” tha Izmaku.

Sipas saj, Nisma pret që Limaj të bëhet kryeparlamentar dhe LVV të udhëheqë qeverinë.

Ajo shtoi se kjo është alternativa e vetme për të dalë nga ngërçi dhe për të formuar institucionet e vendit, duke theksuar se Limaj ka mbështetjen edhe të deputetëve dhe partive të tjera.

Situata mbetet e paqartë dhe pritet të qartësohet në seancën e 21 korrikut.