Presidenti i Iranit, Masoud Pezeshkian, ka akuzuar Shtetet e Bashkuara si përgjegjëse për sulmet e fundit të Izraelit ndaj Iranit, duke e cilësuar Uashingtonin si “shkaku kryesor” i përshkallëzimit të tensioneve në rajon. Deklarata u raportua nga rrjeti televiziv Al Jazeera.
Sipas Pezeshkian, edhe pse SHBA fillimisht tentoi të shmangte përgjegjësinë për sulmet, situata në terren dhe reagimi i forcave iraniane zbuluan përfshirjen e saj të drejtpërdrejtë.
"Edhe pse fillimisht u përpoqën ta fshihnin rolin e tyre, pas reagimit vendimtar dhe parandalues të forcave të armatosura të vendit tonë dhe vëzhgimit të paaftësisë së dukshme të regjimit sionist [Izraelit], ata në mënyrë të pashmangshme dolën në pah,” tha Pezeshkian, duke iu referuar Shteteve të Bashkuara.
Ai shtoi se, pavarësisht humbjeve që ka pësuar Irani, është koha që të gjitha palët të lënë mënjanë dallimet dhe të bashkohen për të aktivizuar kapacitetet e mëdha të popullit iranian në mbrojtje të sovranitetit dhe stabilitetit kombëtar.
