Për qendërmbrojtësin kuqezi, interes nga Katari
Berat Gjimshiti ka pasur një ofertë nga Katari, por është refuzuar nga Atalanta, sipas mediave pranë skuadrës bergamaske.
Më saktësisht, është ekipi i Al-Rayyan që ishte gati të paguante 12 milionë euro për qendërmbrojtësin, padyshim e shoqëruar edhe me një pagë të lartë për shqiptarin.
Gjimshiti ka edhe 1 vit kontratë me Atalantën, ku merr pjesë rregullisht në kupat e Europës dhe ku vitin e kaluar arriti të fitonte edhe Europa League.
Berat Gjimshiti luan në Itali prej 2016, qëkur u transferua nga Zürich tek Atalanta dhe e njeh mirë futbollin italian, ku numëron më shumë se 350 ndeshje në të gjitha aktivitetet. Gjimshiti ka qenë edhe pjesë e Avellino dhe Benevento në Serie B.
