Prokuroria Themelore në Prishtinë ka kërkuar caktimin e masës së paraburgimit për pesë zyrtarë policorë, të cilët janë ndaluar në lidhje me rastin tragjik të vdekjes së Agon Zejnullahut, një i ri që ndërroi jetë pas ndalimit nga policia më 7 korrik.

Lajmi është konfirmuar nga zëdhënësja e Prokurorisë, Kaltrina Shala, e cila njoftoi se kërkesa për paraburgim është dorëzuar zyrtarisht nga prokurori i rastit në Gjykatën Themelore Dega në Lipjan.

Agon Zejnullahu, sipas informacioneve të deritanishme, ishte arrestuar nga policia në gjendje të dehur, me dyshimin se po shkaktonte shqetësim publik. Ai humbi jetën në orët e para të mëngjesit, nën rrethana që kanë ngritur shumë pikëpyetje.

Ndaj pesë zyrtarëve policorë është ngritur dyshimi për veprën penale “Vrasje nga pakujdesia”. Ata janë ndaluar për 48 orë dhe janë rekomanduar për suspendim nga Inspektorati Policor i Kosovës (IPK), i cili po ashtu po zhvillon hetimet e veta për këtë rast.

Ndërkohë, edhe Avokati i Popullit ka hapur një hetim për të shqyrtuar nëse gjatë ndërhyrjes policore janë cenuar të drejtat e njeriut, duke kërkuar transparencë dhe përgjegjësi për veprimet e autoriteteve.