Prokuroria Speciale e Kosovës ka ngritur aktakuzë ndaj Faton Klinakut dhe një personi tjetër, N.S., për veprën penale “Kanosja” ndaj kryeministrit në detyrë, Albin Kurti.
Sipas aktakuzës, më 29 gusht 2023, Klinaku e ka kanosur kryeministrin përmes postimeve në profilin e tij në Facebook, duke përdorur fjalë kërcënuese me qëllim ta frikësojë dhe ta detyrojë që të mos ndërmarrë veprime në detyrën e tij.
Pas reagimeve, Klinaku ka përsëritur kërcënimet në një postim të dytë ku shkruante:
“Më parë e vras Albin Kurtin sesa t’ia lëshoj rrugën dhe të iki nga Kosova.”
Gjithashtu, personi tjetër i përfshirë, N.S., e ka kanosur kryeministrin me vrasje përmes postimeve publike në Facebook, duke iu referuar kërcënimeve të Klinakut.
Faton Klinaku, ish-drejtues i Organizatës së Veteranëve të Luftës, ka reaguar pas ngritjes së aktakuzës duke thënë se nuk është njoftuar nga prokuroria dhe se pret me padurim t’i përgjigjet në gjykatë.
