Presidenti ukrainas Volodymyr Zelensky ka deklaruar se shpreson që SHBA-ja të “qëndrojë e fortë” përballë kërkesave ruse, për të hequr sanksionet si kusht për një armëpushim në Detin e Zi.
Moska tha se një armëpushim detar i shpallur të martën për të lejuar kalimin e sigurtë për anijet tregtare, do të fillojë vetëm pasi të hiqen kufizimet perëndimore në tregtinë ruse të ushqimit dhe plehrave.
Zelensky po fliste gjatë një interviste paneli në Paris me gazetarë nga e gjithë Evropa.
I pyetur nga BBC nëse SHBA do t'i rezistonte presionit rus, ai tha: "Shpresoj që po. Zoti e bekoftë, ata do ta bëjnë. Por do të shohim."
Ndërkaq, Shtëpia e Bardhë tha të martën se delegacionet ruse dhe ukrainase kishin rënë dakord për një armëpushim në Detin e Zi pas tre ditësh bisedime të veçanta me zyrtarët amerikanë në Arabinë Saudite.
Por disa orë më vonë, Kremlini lëshoi deklaratën e tij duke përfshirë një listë të kushteve.
Kërkesat e saj përfshijnë revokimin e sanksioneve perëndimore ndaj institucioneve financiare të përfshira në tregtinë bujqësore dhe rivendosjen e aksesit të tyre në sistemin ndërkombëtar të pagesave Swift - një rrjet që lehtëson mesazhet e sigurta financiare.
Trump tha se qeveria amerikane po "shikonte" kërkesën e Moskës për heqjen e kufizimeve, por BE tha të mërkurën se nuk do të konsideronte heqjen e sanksioneve përpara tërheqjes "të pakushtëzuar" të trupave ruse nga territori i njohur ndërkombëtarisht i Ukrainës.
