Policia turke arrestoi 97 studentë në Universitetin Boğaziçi të Stambollit të martën, pas një proteste kundër pjesëmarrjes së predikuesit mysliman Nurettin Yıldız në një konferencë të organizuar nga një klub studentor brenda kampusit.
Studentët kundërshtuan praninë e Yıldız për shkak të deklaratave të tij të diskutueshme mbi martesat e hershme, të cilat kanë ngjallur kritika të gjera në opinionin publik turk.
Sipas guvernatorit të Stambollit, Davut Gül, përplasjet nisën kur protestuesit tentuan të çajnë kordonin e policisë. Gjatë përplasjes, 13 efektivë policie u plagosën pasi ranë në një gropë ndërtimi pesë metra të thellë brenda kampusit.
Protesta në Boğaziçi janë bërë të zakonshme gjatë viteve të fundit, me studentë dhe staf akademik që kundërshtojnë atë që e konsiderojnë si ndërhyrje të qeverisë në punët e brendshme të universitetit. Së fundmi, studentët kanë qenë gjithashtu aktivë në protestat kundër arrestimit të kryebashkiakut të Stambollit, Ekrem Imamoglu, një figurë kyçe opozitare ndaj Presidentit Recep Tayyip Erdogan.
