Autoritetet serbe kanë lëshuar një fletarrest për policin e Kosovës, Dylot Brahimi, pas një incidenti të ndodhur më 23 maj në Mitrovicën e Veriut gjatë një feste të maturantëve serbë. Lajmin e dha ministri i Brendshëm i Serbisë, Ivica Daçiç, duke thënë se ai do të arrestohet “sa herë që të jetë i mundur”.
Ky veprim i Serbisë vjen edhe pse ajo nuk ka juridiksion në Kosovë, e cila ka shpallur pavarësinë që nga viti 2008 dhe njihet nga mbi 100 vende të botës.
Incidenti ndodhi kur një maturant serb dyshohet se provokoi klientët e një kafeneje, dhe një polic i Kosovës ndërhyri. Në rrjetet sociale qarkullojnë video ku shihet i riu duke treguar gishtin e mesëm, ndërsa një person tjetër në kafene bënte simbolin e shqiponjës dykrenore.
Ndërhyrja e policit është kritikuar nga disa si përdorim i “forcës së tepruar”, ndërsa BE dhe shefi i EULEX-it shprehën shqetësim për këtë veprim. Nga ana tjetër, Ministri i Brendshëm i Kosovës, Xhelal Sveçla, e mbrojti policin dhe tha se ai veproi profesionalisht për të parandaluar tensionet pas provokimeve me thirrje nacionaliste si “Kosova është zemra e Serbisë”.
Ministria e Drejtësisë e Serbisë kërkoi hetim ndërkombëtar për rastin, ndërsa Lista Serbe dhe parti të tjera serbe në Kosovë e quajtën ngjarjen “të papranueshme” dhe “dhunë ndaj fëmijëve serbë”.
