Përmbytje të fuqishme dhe reshje të rrëmbyeshme kanë goditur Pakistanin, duke shkaktuar të paktën 24 viktima, mes tyre fëmijë dhe gra, si dhe dhjetëra të plagosur. Situata është më kritike në provincat Khyber Pakhtunkhwa dhe Punjab, ku dëmet materiale dhe humbjet në njerëz janë të konsiderueshme.

Sipas Autoritetit të Menaxhimit të Fatkeqësive në Khyber Pakhtunkhwa, përmbytjet kanë vrarë 11 persona, përfshirë katër fëmijë dhe tre gra, ndërsa gjashtë persona të tjerë kanë mbetur të plagosur. Rreth 56 shtëpi janë dëmtuar, nga të cilat gjashtë janë shkatërruar plotësisht.

Një ngjarje e rëndë është shënuar në Luginën Swat, ku 10 persona janë rrëmbyer nga një lumë që ka dalë nga shtrati për shkak të rritjes së menjëhershme të prurjeve.

Ndërkohë, në provincën Punjab, autoritetet kanë konfirmuar 13 viktima deri të mërkurën. Tragjikisht, tetë prej tyre ishin fëmijë, të cilët humbën jetën pasi çatitë apo muret e shtëpive të tyre u shembën nga reshjet e dendura dhe përmbytjet.

Departamenti Meteorologjik i Pakistanit ka paralajmëruar për rrezik të shtuar përmbytjesh dhe reshjesh intensivederi të paktën të martën e ardhshme, duke u bërë thirrje qytetarëve të shmangin zonat e rrezikshme dhe të marrin masa paraprake.