Një sulm ajror izraelit në jug të Rripit të Gazës ka shkaktuar një tragjedi të rëndë për një familje palestineze, duke lënë të vdekur nëntë nga dhjetë fëmijët e një doktoreshë pediatre, ndërsa djali i saj i vetëm i mbijetuar është plagosur rëndë dhe bashkëshorti ndodhet në gjendje kritike për jetën.
Sipas autoriteteve shëndetësore të Gazës, sulmi ndodhi të premten në shtëpinë e familjes Al Najjar, në jug të qytetit Khan Younis. Dr. Alaa Al Najjar, një pediatre në Klinikën Al Tahrir në Kompleksin Mjekësor Nasser, ndodhej në detyrë në momentin e goditjes dhe ka humbur thuajse të gjithë familjen e saj.
Pamje tronditëse të publikuara nga Mbrojtja Civile palestineze e drejtuar nga Hamasi tregojnë trupat e pajetë të fëmijëve të vegjël që nxirren nga rrënojat e shtëpisë së shkatërruar. Në video, shpëtimtarët shihen duke kërkuar nëpër rrënoja, duke luftuar me flakët dhe duke bërtitur sa herë që gjejnë një trup, përpara se të vendosin fëmijët në qese mortore.
