Sekretari i Përgjithshëm i Këshillit të Evropës, Alain Berset, ka mbrojtur pavarësinë e Gjykatës Evropiane të të Drejtave të Njeriut, duke thënë se ajo nuk duhet të ndikohet nga presioni politik.
Në një mesazh të publikuar të shtunën, Berset tha se “debati është i shëndetshëm, por politizimi i Gjykatës nuk është”. Ai theksoi se në një shtet ligjor, gjykatat duhet të jenë të paanshme dhe të lira nga ndikimet politike.
Kjo deklaratë vjen pas një letre të përbashkët të nënshkruar nga Italia dhe tetë vende të tjera evropiane, të cilat kërkuan që të rishikohet mënyra se si Gjykata interpreton Konventën Evropiane për të Drejtat e Njeriut, sidomos kur bëhet fjalë për çështjet e migracionit.
Sipas Berset, është normale që demokracitë të reflektojnë mbi sfida të vështira si migracioni, por kjo duhet të bëhet në mënyrë të rregullt dhe përmes institucioneve të duhura.
Ai përfundoi duke thënë se qartësia dhe pavarësia janë thelbësore për të ruajtur besimin tek drejtësia në Evropë.
