Një helikopter ushtarak rus i tipit Mi-8 është rrëzuar në rajonin Oryol gjatë një fluturimi stërvitor. Ngjarja ka ndodhur më 23 maj dhe, sipas burimeve zyrtare, i gjithë ekuipazhi ka humbur jetën.
Sipas dëshmitarëve që ndodheshin pranë vendit të ngjarjes, menjëherë pas rrëzimit janë dëgjuar shpërthime të forta dhe është përhapur zjarr, gjë që e ka bërë të pamundur ndihmën e menjëhershme.
Pamjet dhe videot që qarkullojnë në rrjetet sociale tregojnë shtëllunga të mëdha tymi që ngriheshin nga vendi i rrëzimit. Sipas mediave ruse, shkaku i mundshëm i aksidentit ishte një defekt teknik, por autoritetet ushtarake kanë nisur një hetim për të zbuluar detaje të mëtejshme.
Ky është një tjetër rast që shton shqetësimet për gjendjen e mjeteve fluturuese ushtarake në Rusi. Vetëm në muajin prill, një avion bombardues Tu-22M3 u rrëzua në rajonin Irkutsk, dhe pak ditë më parë, një Su-25 bëri një ulje emergjente në Lindjen e Largët të vendit.
