TikTok nuk do të ndalohet… të paktën jo tani. Presidenti amerikan Donald Trump ka vendosur të shtyjë sërish afatin për ndalimin e aplikacionit të famshëm kinez në SHBA, duke i dhënë edhe 90 ditë të tjera kohë për të arritur një marrëveshje që do ta mbajë TikTok-un të hapur për përdoruesit amerikanë.

Lajmi është konfirmuar edhe nga zëdhënësja e Shtëpisë së Bardhë, e cila u shpreh:
“Presidenti Trump nuk dëshiron që TikTok të bllokohet. Kjo zgjatje do të lejojë që të përfundojë procesi i marrëveshjes, në mënyrë që amerikanët të vazhdojnë të përdorin platformën me siguri për të dhënat e tyre.”

TikTok, që është bërë një prej aplikacioneve më të përdorura nga të rinjtë në SHBA, është përballur me kërcënime të vazhdueshme për ndalim, për shkak të shqetësimeve për privatësinë dhe ndikimin e Kinës përmes kompanisë mëmë, ByteDance.

Fillimisht ishte caktuar që ndalimi të hynte në fuqi më 19 janar, por afati është shtyrë dy herë nga presidenti Trump — fillimisht deri më 5 prill, pastaj në qershor, dhe tani edhe një herë me 90 ditë shtesë.

Nga ByteDance ndërkohë vjen reagimi se një marrëveshje nuk është arritur ende, pasi “ka ende çështje të pazgjidhura”.