Një lajm prekës ka tronditur opinionin publik në Arabinë Saudite dhe më gjerë. Princi saudit, Alwaleed bin Khaled bin Talal Al-Saud, i njohur nga të gjithë si “Princi i Fjetur”, ka ndërruar jetë në moshën 36-vjeçare, pas gati dy dekadash në gjendje kome. Lajmin e dha vetë babai i tij, Princi Khaled bin Talal, përmes një postimi emocional në rrjetin social X (ish-Twitter), të shtunën, më 19 korrik.

“Oh, pusho në paqe... me besim në vullnetin e Allahut dhe me dhimbje të madhe, vajtojmë humbjen e birit tonë të dashur,” shkroi ai, duke ndarë një foto bardh e zi të djalit të shtrirë në shtrat spitali.

Alwaleed lindi në prill të vitit 1990. Në vitin 2005, kur ishte vetëm 15 vjeç, pësoi një aksident të rëndë me makinë në Londër, ndërsa ndodhej atje për të ndjekur një akademi ushtarake. Aksidenti i shkaktoi dëmtime të rënda në tru dhe e futi në gjendje kome që zgjati 19 vite.

Gjatë gjithë kësaj kohe, ai qëndroi në një qendër mjekësore në Riad, nën kujdesin e vazhdueshëm të babait të tij, i cili nuk u largua kurrë nga ana e tij. Dhoma e tij në spital ishte gjithmonë e zbukuruar në ditë të veçanta si Ramazani, Bajrami apo Dita Kombëtare, sikur ai të ishte i pranishëm.

Princi Khaled ndante shpesh në rrjetet sociale video që tregonin lëvizje të vogla të të birit – si ngritje gishti apo përpjekje për të lëvizur dorën – që jepnin shpresë te ndjekësit e tij.

Historia e Princit të Fjetur u bë simbol i dashurisë prindërore, përkushtimit dhe besimit të palëkundur. Shumë njerëz, përfshirë edhe figura të njohura dhe qytetarë të thjeshtë, e vizituan ndër vite për të dhënë mbështetje.